प्रदीप वाघ यांचे उद्यापासून उपोषण

मोखाडा, ता. ७ (बातमीदार) : मोखाडा तालुक्यातील आधार कार्ड केंद्र, जातीचे दाखले, पाणीपुरवठा योजना, रस्त्यांची झालेली वाताहत आणि आरोग्य समस्या अशा विविध मागण्यांकडे शासनाचे लक्ष वेधण्यासाठी मोखाडा पंचायत समितीचे उपसभापती प्रदीप वाघ गुरुवारपासून (ता. ९) मोखाडा पंचायत समिती कार्यालयासमोर उपोषण करणार आहेत. त्याबाबतचे पत्र प्रदीप वाघ यांनी जिल्हाधिकारी आणि सर्व शासकीय यंत्रणांना दिले आहे.
ऐन उन्हाळ्यात दुरुस्तीच्या नावाखाली सायदे धरणाचे पाणी सोडून दिले आहे. याउलट दुरुस्तीचे काम कासवगतीने सुरू असून यामध्ये भ्रष्टाचार झाल्याचा आरोप वाघ यांनी केला आहे. मोखाडा तालुक्यातील चास, गोमघर, धामणशेत आणि कारेगाव या पाणीपुरवठा योजनांची कामे दोन ते तीन वर्षांपासून सुरू असून ती अद्यापही पूर्ण झालेली नाहीत. नळयोजनांची कामे सदोष असून संबंधित ठेकेदारांना बिले देण्यात आल्याने लोकांना पाण्यापासून वंचित ठेवणाऱ्या ठेकेदार आणि अधिकाऱ्यांवर कारवाई करावी, तसेच या योजना पूर्ण कराव्यात, अशी मागणी प्रदीप वाघ यांनी निवेदनाद्वारे केली आहे.