सावत्र पित्याकडून ११ वर्षीय मुलीवर अत्याचार

मुंबई, ता. ७ : वाढदिवसानिमित्त देवदर्शन आणि नवीन कपड्यांचे प्रलोभन दाखवून ११ वर्षीय मुलीवर बलात्कार केल्याप्रकरणी मुंबईतील समतानगर पोलिसांनी सावत्र पित्याला अटक केली. आरोपीने घटनेबाबत कोणालाही माहिती न देण्यासाठी पीडित मुलीला धमकावल्याचा व मारहाण केल्याचा आरोप आहे.
शिर्डीतील एका हॉटेलमध्ये आरोपीने हा गैरप्रकार केला. याप्रकरणी पीडित मुलीच्या आईने केलेल्या तक्रारीनंतर समतानगर पोलिसांनी बलात्कार व बाललैंगिक अत्याचार प्रतिबंधक कायद्यांतर्गत गुन्हा दाखल केला. तक्रारीनुसार ११ वर्षीय पीडित मुलीचा वाढदिवस असल्यामुळे आरोपीने तिला देवदर्शनासाठी नेतो तसेच नवीन कपडे देतो असे पत्नीला सांगितले; परंतु शिर्डीतील एका हॉटेलमध्ये नेऊन मुलीवर अत्याचार केला. तसेच या प्रकाराची कुठेही वाच्यता करू नये, अशी धमकी दिली, तसेच मारहाणही केली. हा प्रकार पीडित मुलीने आईला सांगितला. त्यानंतर पीडित मुलीला शताब्दी रुग्णालयात नेण्यात आले. तेथे तिच्यावर उपचार करण्यात आले. समतानगर पोलिस ठाण्यात तक्रार करण्यात आल्यानंतर सोमवारी ६ मार्चला आरोपीला त्याच्या बहिणीच्या घरातून अटक करण्यात आली.