सलोखा योजनेअंतर्गत शुल्क आकारणीमध्ये सवलत

पालघर, ता. १२ (बातमीदार) : महाराष्ट्र शासन महसूल व वन विभागाचे सलोखा योजनेंतर्गत मुद्रांक शुल्क व नोंदणी शुल्कात सवलत योजना ३ जानेवारी २०२३ पासून सुरू करण्यात आली आहे. शासन निर्णयाद्वारे शेतजमिनीचा ताबा व वहिवाटीबाबत शेतकऱ्यांतील आपापसांतील वाद मिटवण्यासाठी व समाजामध्ये सलोखा निर्माण व्हावा व एकमेकांतील सौख्य, शांतता व सौहार्द वाढीस लागण्यासाठी ही योजना फायदेशीर आहे. एका शेतकऱ्याच्या नावावरील शेतजमिनीचा ताबा दुसऱ्या शेतकऱ्याकडे व दुसऱ्या शेतकऱ्याच्या नावावरील शेतजमिनीचा ताबा पहिल्या शेतकऱ्याकडे असणाऱ्या शेतजमीनधारकांचे अदलाबदल दस्तांसाठी मुद्रांक शुल्क नाममात्र एक हजार रुपये व नोंदणी शुल्क एक हजार रुपये आकारण्याबाबत सवलत देण्यासाठी सलोखा योजना राबवण्यास शासन मान्यता देण्यात आलेली आहे. तरी जिल्ह्यातील नागरिकांनी या योजनेचा लाभ घेण्यासाठी संबंधित गावातील तलाठी कार्यालयाशी संपर्क साधावा, असे जिल्हा प्रशासनाकडून आवाहन करण्यात आले आहे.