अखेर रेवदंडामध्ये डाकघर कार्यालय सुरू

रेवदंडा, ता. १४ (बातमीदार) : येथील भाड्याच्या जागेत असलेले डाकघर कार्यालय गेले आठ महिने चौलमध्ये तात्पुरत्या स्वरूपात हलवून नागरिकांना सेवा सुरू केली होती. यात रेवदंडामधील नागरिकांना दोन किलोमीटरपर्यंत पायपीट करावी लागत होती. मात्र ही पायपीट अखेर थांबली असून रेवदंडा गावातील सुतारआळी नव्याने डाकघर कार्यालय सुरू झाले आहे. त्यामुळे नागरिकांमध्ये समाधानाचे वातावरण आहे.
गेल्या जुलै महिन्यात गणपती आळीतील भाडेतत्त्वावर सुरू असलेल्या डाकघराची जागा घरमालकांनी सोडण्यास सांगितली होती. त्यानंतर रेवदंडामध्ये जागा उपलब्ध होईपर्यंत सुमारे दोन किलोमीटर अंतरावर असलेल्या चौलमध्ये डाकघर कार्यालयाचा कारभार चालत होता. मात्र, यात रेवदंडामधील नागरिकांना दोन किलोमीटरपर्यंत पायपीट करावी लागत होती. डाकघरातील बचत ठेव, रजिस्टर, सेवानिवृत्त धारकांना निवृत्ती वेतन आणण्यासाठी वेळेचा अपव्यय व आर्थिक भुर्दंड सोसावा लागत होता.
ज्येष्ठ नागरिकांना पायपीट करणे शक्य नसल्याने रिक्षेचा आधार द्यावा लागत होता. शिवाय व्यवहार होईपर्यंत रिक्षा उभी करून ठेवावी लागत असल्याने आर्थिक भुर्दंड सहन करावा लागायचा. मात्र, दोन दिवसांपूर्वीच रेवदंडा गावातील सुतारआळीत डाकघर कार्यालय सुरू झाल्याने नागरिकांना दिलासा मिळाला आहे.