ईडीचे छत्रपती संभाजीनगरात छापेमारी

सकाळ वृत्तसेवा

मुंबई, ता. १७ : पंतप्रधान आवास योजनेतील निविदांमधील घोटाळ्याप्रकरणी ईडीकडून छत्रपती संभाजीनगरमधील ९ ठिकाणी छापेमारी करण्यात आल्याची माहिती समोर आली आहे. आज सकाळीच ईडीकडून शहरातील ३ ठिकाणी छापेमारी सुरू केली. त्यानंतर ईडीने सहा वेगवेगळ्या ठिकाणी छापेमारी केल्याचे समजते.

४० हजार घरांच्या जवळपास ४ हजार कोटींच्या या प्रकल्पात अनेक बडे मासे अडकण्याची शक्यता आहे. या प्रकरणी महापालिका उपायुक्त अपर्णा थेटे यांच्या तक्रारीवरून तीन कंत्राटदार कंपन्यांसह त्यांच्या १९ मालक-भागीदारांविरोधात सिटीचौक पोलिस ठाण्यात गुन्हा दाखल करण्यात आला आहे.

पंतप्रधान आवास योजनेसाठी समरथ मल्टीविज इंडिया, पुणे येथील सिद्धार्थ प्रॉपर्टीज, नवनिर्माण कन्स्ट्रक्शन यासह चार कंपन्यांनी निविदा भरल्या होत्या. चार हजार कोटींच्या या प्रकल्पात ४० हजार घरकुलांचा समावेश होता; मात्र समरथ कन्स्ट्रक्शनने बँक गॅरंटी भरण्यास असमर्थ असल्याचे सांगितले होते. यानंतर अनेकदा पाठपुरावा केल्यानंतर समरथ कंपनीने पडेगाव येथील घरकुल प्रकल्पासाठी बँक गॅरंटी भरली. यात चारपैकी एक कंपनी अपात्र ठरली होती.

पाहणीसाठी समिती स्थापन
निविदा घोटाळ्यात अडकलेल्या समरथ कन्स्ट्रक्शन, इंडो ग्लोबल इन्फ्रास्ट्रक्चर सर्व्हिसेस आणि जग्वार ग्लोबल सर्व्हिसेस या कंत्राटदार कंपन्यांनी संयुक्त भागीदारीमध्ये पुणे परिसरात बांधलेल्या बहुमजली इमारतींची पाहणी करण्यासाठी महापालिकेने समिती स्थापन केली आहे. ही समिती या कंत्राटदारांनी बांधलेल्या इमारतींची पाहणी करून अहवाल सादर करणार असल्याची माहिती पालिका प्रशासक डॉ. अभिजीत चौधरी यांनी दिली.