सुरक्षा जवानाचा आयुक्तांकडून सत्कार

भाईंदर, ता. २२ (बातमीदार) : मिरा रोड एस.के. स्टोन येथील मैदानात बागेश्वर धाम सरकार यांच्या दिव्यदर्शनाचा कार्यक्रम नुकताच पार पडला. या कार्यक्रमात अनेक महिलांच्या सोनसाखळ्या व मंगळसूत्र चोरण्याच्या घटना घडल्या आहेत. या कार्यक्रमाच्या सुरक्षा व्यवस्थेत कर्तव्य बजावत असताना महाराष्ट्र सुरक्षा बलाचे जवान शिवाजी केदार यांना त्याठिकाणी सुमारे दोन लाख रुपयांची सोनसाखळी पडलेली आढळून आली. मात्र केदार यांनी प्रामाणिकपणे ही सोनसाखळी मिरा रोड पोलिस ठाण्यात जमा केली. शिवाजी केदार यांच्या कर्तव्यदक्षतेची व प्रामाणिकपणाची दखल घेऊन मिरा भाईंदर महानगरपालिकेचे आयुक्त दिलीप ढोले यांनी केदार यांचा सत्कार केला.