मानसिक तणावातून हल्ला; दोघांचा मृत्यू
सकाळ वृत्तसेवा
मुंबई, ता. २४ : मुंबईतील ग्रँट रोड परिसरात डी. बी. मार्ग पोलिस ठाण्याच्या हद्दीत एका व्यक्तीने तब्बल ५ जणांवर शुक्रवारी (ता. २४) चाकूने हल्ला केल्याची घटना घडली आहे. या हल्ल्यात दोन जणांचा मृत्यू झाला असून तिघे जण गंभीर जखमी झाले आहेत. त्यांना एच. एन. रिलायन्स हॉस्पिटल तसेच नायर रुग्णालय येथे उपचारार्थ दाखल करण्यात आले आहे. जयेंद्र मेस्त्री आणि नीला मेस्त्री अशी मृत पती-पत्नीची नावे आहेत. आरोपीला डी. बी. मार्ग पोलिसांनी ताब्यात घेतले आहे.
आरोपीचे नाव चेतन गाला (वय ५४) आहे. डी. बी. मार्ग पोलिस ठाण्याच्या हद्दीत पार्वती मेन्शन बिल्डींग येथे चेतन गालाने शुक्रवारी दुपारी ३.३० वाजण्याचे सुमारास चाकूने शेजारी राहणाऱ्यांवर प्राणघातक हल्ला केला. स्वतःचे कुटुंब सोडून गेल्यामुळे मानसिक तणावातून आणि रागाच्या भरात त्याने हल्ला केल्याची माहिती मिळत आहे. त्याने ज्या व्यक्तींवर हल्ला केला त्यांच्यामुळेच स्वतःचे कुटुंब सोडून गेले या विचारानेच त्याने हल्ला केल्याची प्राथमिक माहिती आहे. डी. बी. मार्ग पोलिसांनी हत्येचा गुन्हा दाखल करून आरोपीला अटक केली आहे.
