भरधाव गाडीची सुरक्षा रक्षकाला धडक

मुंबई, ता. २५ : विमानतळ परिसरात असलेल्या पार्किंगचे नियोजन करण्यासाठी नेमलेल्या सुरक्षा रक्षकाला एका चारचाकीने जोरदार धडक दिली. त्यात संबंधित सुरक्षा रक्षकाला गंभीर दुखापत झाली असून चालकावर सहार पोलिसांनी गुन्हा दाखल केला आहे. पीडित व्यक्तीवर कूपर रुग्णालयात उपचार सुरू आहेत.
तक्रारदार महेंद्र मिस्त्री क्रिस्टल सिक्युरिटी कंपनीमध्ये सुरक्षारक्षक म्हणून काम करतात. संबंधित कंपनी ही छत्रपती शिवाजी महाराज आंतरराष्ट्रीय विमानतळ परिसरामध्ये सुरक्षा पुरवण्याचे काम करते. २४ मार्च रोजी रात्री सव्वाबाराच्या सुमारास त्यांना नौपाडा परिसरातील लीला गॅलरी प्लॉट येथील सुरक्षा व्यवस्था पाहण्याचे काम सोपवण्यात आले होते. त्या वेळी एक पांढऱ्या रंगाची इनोव्हा कार अंधेरी-कुर्ला रोडवरून पार्किंग करण्यासाठी येऊ लागली. ते मिस्त्री यांनी पाहिल्यावर त्यांनी चालकाला पार्किंग न करण्याकरिता हातवारे करत ओरडण्यास सुरुवात केली; मात्र त्याने मिस्त्रींचे काहीच न ऐकता गाडी त्यांच्या दिशेने भरधाव वेगाने नेल्याने कारची जोरदार धडक त्यांना बसली. या अपघातात मिस्त्री यांच्या डाव्या हाताला गंभीर दुखापत झाल्याने त्यांना कूपर रुग्णालयात हलवण्यात आले. तेव्हा डॉक्टरने त्यांच्या हाताला फ्रॅक्चर झाल्याचे निदान केले.