आशा भोसले यांना लता मंगेशकर पुरस्कार

मुंबई, ता. १८ : मास्टर दीनानाथ मंगेशकर स्मृती प्रतिष्ठानमार्फत देण्यात येणारा लता दीनानाथ मंगेशकर पुरस्कार यंदा ज्येष्ठ गायिका आशा भोसले यांना जाहीर झाला आहे. उषा मंगेशकर यांनी आज याबाबत घोषणा केली. मागील वर्षी २४ एप्रिलला पहिला पुरस्कार पंतप्रधान नरेंद्र मोदी यांना प्रदान करण्यात आला होता.
पुरस्कार प्रदान सोहळा मास्टर दीनानाथ मंगेशकर यांच्या स्मृतिदिनी सोमवारी २४ एप्रिलला माटुंगा येथील षण्मुखानंद हॉल येथे सायंकाळी ६ वाजता आयोजित करण्यात आला आहे. पंडित हृदयनाथ मंगेशकर या पुरस्कार समारंभाच्या अध्यक्षस्थानी असतील. यासोबतच मास्टर दीनानाथ मंगेशकर पुरस्कार भारतीय संगीत क्षेत्रासाठी पंकज उधास यांना, वर्षातील सर्वोत्कृष्ट नाटकासाठी प्रशांत दामले फॅन फाऊंडेशनच्या गौरी थिएटर्सला आणि समाजसेवेच्या क्षेत्रात समर्पित सेवेसाठी श्री सद्‍गुरू सेवा संघ ट्रस्ट यांना जाहीर करण्यात आला आहे. साहित्य क्षेत्रात समर्पित सेवेसाठी ग्रंथाली प्रकाशनला विशेष पुरस्कार प्रदान केला जाणार आहे. चित्रपट आणि नाटक क्षेत्रात समर्पित सेवेसाठी प्रसाद ओक यांना विशेष पुरस्कार आणि चित्रपट क्षेत्रातील सेवेसाठी विद्या बालन यांना मास्टर दीनानाथ मंगेशकर पुरस्कार प्रदान केला जाणार आहे.
पुरस्कार वितरण सोहळ्यात संगीत आणि नृत्याचा कार्यक्रम होईल. पद्मश्री हरिहरन आणि डॉ. राहुल देशपांडे तो सादर करतील. नृत्याच्या कार्यक्रमात मेघरंजनी मेधी आणि मरामी मेधी आणि साथीदार असतील. संगीत आणि नृत्याचा हा कार्यक्रम हृदयेश आर्टसतर्फे आयोजित करण्यात आला आहे.
...
यंदा पुरस्काराचे दुसरे वर्ष
मास्टर दीनानाथ मंगेशकर स्मृती प्रतिष्ठान आणि हृदयेश आर्टस यांच्या संयुक्त विद्यमाने मास्टर दीनानाथ मंगेशकर यांच्या ८१ व्या पुण्यतिथीनिमित्त कार्यक्रमाचे आयोजन करण्यात आले आहे. मागील वर्षीपासून मंगेशकर कुटुंबीय आणि मास्टर दीनानाथ मंगेशकर स्मृती प्रतिष्ठानने भारतरत्न लता दीदींच्या स्मरणार्थ ‘लता दीनानाथ मंगेशकर पुरस्कार’ सुरू केला आहे. तो मास्टर दीनानाथ मंगेशकर यांच्या स्मृतिदिनी दरवर्षी एका व्यक्तीला दिला जातो.