ठाण्यात रंगणार मुख्यमंत्री चषक टी-२० लीग क्रिकेट स्पर्धा

ठाणे (वार्ताहर) : दादोजी कोंडदेव स्टेडियमवर १ ते ८ मेदरम्यान प्रथमच मुख्यमंत्री चषक टी-२० लीग क्रिकेट स्पर्धेचे आयोजन करण्यात आले आहे. या स्पर्धेला मुंबई क्रिकेट संघटनेची मान्यता आहे. या स्टेडियमवर आतापर्यंत खेळले जाणारे ११ वे वर्ष आहे. आयपीएल आणि रणजी करडंक स्पर्धेत खेळलेले क्रिकेटपटू खेळणार असल्याने ठाणेकरांना रंगतदार सामन्याची ही मेजवानी ठरणार असल्याची माहिती महाराष्ट्र माझा सेवा संस्थेचे सल्लागार आणि माजी नगरसेवक विकास रेपाळे यांनी दिली. मुख्यमंत्री एकनाथ शिंदे यांच्या हस्ते उद्या (ता. १) सकाळी ९ वाजता मुख्यमंत्री चषक टी-२० लीग क्रिकेट स्पर्धेचा शुभारंभ होणार आहे. या स्पर्धेत शशांक सिंग, अखिल हेरवाडकर, रोहन राजे, अंकित चव्हाण, रणजीपटू आशय सरदेसाई, कौस्तुभ पवार, जय बिस्ट, विनायक भोईर, सुजित नायक, धृमिल मटकर, पराग खानापूरकर यांचा समावेश राहणार आहे. स्पर्धेत विजयी संघाला ८८,८८८ रुपये आणि मुख्यमंत्री चषक, उपविजयी संघाला ४४,४४४ रोख आणि चषक देऊन सन्मानित करण्यात येणार आहे.