निर्मल हाऊसिंग प्रकरणी आरोपी संचालकाविरोधात फसवणुकीची अजून एका गुन्हा

सकाळ वृत्तसेवा
मुंबई, ता. ६ : मुंबई पोलिसांच्या आर्थिक गुन्हे शाखेने निर्मल लाईफस्टाईल लिमिटेडचे संचालक धर्मेश जैन आणि राजीव जैन यांच्यावर आणखी एका गृहनिर्माण प्रकरणातील फसवणुकीबाबत गुन्हा दाखल केला आहे. गृहनिर्माण प्रकल्पात ५४ सदनिका खरेदीदारांची फसवणूक केल्याप्रकरणी कंपनीच्या दोन्ही संचालकांना अटक करण्यात आली आहे. मुलुंड पश्चिमेतील गृहनिर्माण प्रकल्पातील सदनिकाधारकांची आर्थिक फसवणूक करून आरोपी संचालकांनी आजतागायत त्यांना सदनिका हस्तांतरित केलेल्या नाहीत.

आर्थिक गुन्हे शाखेने धर्मेश आणि राजीव यांना याआधी २७ एप्रिल रोजी अटक केली होती. गुरुवारी पहिल्या गुन्ह्यात मुंबईतील न्यायालयाने त्यांना न्यायालयीन कोठडी सुनावली होती. त्यानंतर शुक्रवारी आर्थिक गुन्हे शाखेच्या अधिकाऱ्यांनी दुसऱ्या प्रकरणात चौकशीसाठी त्यांना ताब्यात घेतले. आता आर्थिक गुन्हे शाखा दोन्ही आरोपी संचालकांची एकूण तीन प्रकरणांत चौकशी करत आहे. मुंबई पोलिसांच्या आर्थिक गुन्हे शाखेने पहिल्यांदा डिसेंबर २०२१ मध्ये दोघांविरोधात गुन्ह्याची नोंद केली होती.

५४ सदनिकाधारकांची फसवणूक
नवीन नोंदवलेल्या गुन्ह्यात मुलुंड पश्चिमेतील एलबीएस मार्गावर असलेल्या ३९ मजली ‘झिरकॉन’ गृहनिर्माण प्रकल्पात ५४ सदनिकाधारकांची फसवणूक केल्याचा आरोप आहे. आरोपात दाखल केलेल्या तक्रारीवर हा गुन्हा आधारित आहे. सदनिका वेळेवर न मिळाल्याने खरेदीदारांनी झिरकॉन फ्लॅट ओनर्स वेल्फेअर असोसिएशनची स्थापना केली. असोसिएशनच्या माध्यमातून पोलिसात तक्रार दाखल केली. पोलिस तपासात सदनिका खरेदीदारांकडून विकसकाने ८० कोटी ९३ लाख रुपये स्वीकारल्याची माहिती उघड झाली. विकसकाकडून सादर करण्यात आलेल्या कागदपत्रानुसार, त्यातील ८० सदनिकाधारकांना पूर्ण रक्कम, तर १७७ जणांना अंशतः रक्कम परत करण्यात आली आहे. १३२ सदनिकाधारकांना प्रकल्पातून बाहेर पडायचे नसल्याचे तपासात निष्पन्न झाले आहे. सदनिकाधारकांकडून स्वीकारण्यात आलेल्या एकूण रकमेपैकी ३९ कोटींचा दावा अद्याप बाकी असल्याचे सूत्रांनी सांगितले.