मुंबई महापालिका बांधणार सात मलजल प्रक्रिया केंद्रे

मुंबई, ता. ७ ः मुंबई महापालिकेने काही भागांत सात मलजल प्रक्रिया केंद्रे बांधण्याचा निर्णय घेतला आहे. त्यांचा आराखडा तयार करण्यात येत असल्याची माहिती पालिका प्रशासनाने नुकतीच दिली.

पालिकेने शंभर टक्के मलनिःसारण वाहिन्यांच्या सुविधा उपलब्ध करण्याचा निर्धार व्यक्त केला आहे. मुंबईत सध्या २०४५ किलोमीटर लांबीचे मलनिःसारण वाहिन्यांचे जाळे आहे. सध्या मुंबईच्या एकूण ७४.९८ टक्के लोकसंख्येला मलनिःसारण सुविधा पुरवली जाते. मलनिःसारण वाहिन्यांच्या जाळ्यांमध्ये सुधारणा करणे आणि काही ठिकाणी मलवाहिन्या नव्याने टाकण्याला यंदा पालिका प्रशासन वेग देणार आहे; मात्र सात ठिकाणी मलजल प्रक्रिया केंद्रे नव्याने बांधण्याचा निर्णय घेण्यात आला आहे. त्याबाबत प्रक्रिया सुरू असल्याची माहिती पालिका प्रशासनाने दिली. त्याबाबतची कामे यंदा प्राधान्याने घेतली गेली आहेत.

धारावी, मालाड, वर्सोवा, घाटकोपर, भांडुप, वांद्रे, वरळी आदी ठिकाणी मलजल प्रक्रिया केंद्रे आहेत. तिथे मलजलावर प्रक्रिया होते. त्यात आणखी नवी सात केंद्रे बांधल्यास पर्यावरणासाठी हिताचे होईल, असा विश्वास पालिका प्रशासनाने व्यक्त केला आहे.