गृहनिर्माण परिषदेतील घोषणांचा लवकरच जीआर

सकाळ वृत्तसेवा
मुंबई, ता. २७ : सहकारी गृहनिर्माण परिषदेत ज्या घोषणा झाल्या त्याचे शासन आदेश (जीआर) काढण्याचे निर्देश उपमुख्यमंत्री देवेंद्र फडणवीस यांनी मुख्य सचिवांना दिले असल्याची माहिती आमदार प्रवीण दरेकर यांनी दिली. घोषणा झालेले सर्व विषय मार्गी लावण्यासाठी सोमवारी (ता.२९) मंत्रालयात बैठक होणार असल्याची माहितीही त्यांनी दिली. शनिवारी (ता.२७) चारकोप येथील राकेश गृहनिर्माण सहकारी संस्थेचा स्वयंपुनर्विकासांतर्गत भूमिपूजन सोहळा दरेकरांच्या हस्ते पार पडला. यावेळी ते बोलत होते. याप्रसंगी खासदार गोपाळ शेट्टी, मुंबई हौसिंग फेडरेशनचे अध्यक्ष प्रकाश दरेकर, माजी नगरसेविका संध्या दोशी, आर्किटेक हर्षद मोरे, व्यंकटेश कामत, ॲड. अखिलेश चौबे, नगरसेवक श्रीकांत कवठणकर उपस्थित होते.

यावेळी दरेकर म्हणाले, गेल्या १५-२० वर्षांपासून इमारतीचा पुनर्विकास गृहनिर्माण संस्थेने स्वतःच करावा अशा प्रकारचा एक विषय घेऊन मी एक चळवळ उभी केली. स्वयंपुनर्विकास एक चळवळ म्हणून उभी राहिली आहे. यात राज्य सरकारलाही सहभागी केले आहे. नेस्को मैदानावर अभूतपूर्व परिषद झाली. त्यावेळी झालेल्या घोषणांचे जीआर बनण्याची प्रक्रिया सुरू झाली. मागणी वाढतेय यासाठी सरकारकडे सेल्फ डेव्हलपमेंट फायनान्स कॉर्पोरेशन करण्याची मागणी केली आहे. सेल्फ डेव्हलपमेंट महामंडळ स्थापन करणार असल्याची घोषणा मुख्यमंत्री आणि उपमुख्यमंत्री यांनी केली आहे. लवकरच ते कार्यान्वित करून घेऊ, अशी माहितीही दरेकर यांनी दिली.