कोकण रेल्वे दुपदरीकरणासाठी केंद्राने खर्च द्यावा ः राऊत

सकाळ वृत्तसेवा
मुंबई, ता. ४ : कोकण रेल्वे मार्गावर एकच रेल्वे मार्गिका असल्याने रेल्वे वाहतुकीवर मर्यादा येत आहे. त्यामुळे कोकण रेल्वेचे दुपदरीकरण करणे काळाची गरज असून त्यासाठी तब्बल २९ हजार कोटींचा खर्च अपेक्षित आहे. मात्र, हा खर्च कोकण रेल्वेच्या आवाक्याबाहेर आहे. त्यामुळे केंद्र सरकारने कोकण रेल्वे मार्गाच्या दुपदरीकरणाचा आर्थिक भार उचलावा किंवा कोकण रेल्वेचे भारतीय रेल्वेत विलीनीकरण करावे, अशी मागणी जोर धरू लागली आहे. पावसाळी अधिवेशनात लोकसभेत हा मुद्दा मांडणार असल्याची माहिती खासदार विनायक राऊत यांनी दिली आहे.

कोकण रेल्वे मार्गावर दररोज वीस ते पंचवीसपेक्षा जास्त गाड्या धावत आहेत. गणेश उत्सव, होळीसारख्या सणात मोठ्या प्रमाणात नागरिक कोकणात जातात. कोकणात जाण्यासाठी रस्तेमार्गापेक्षा रेल्वे मार्गाने जाण्यास प्रवासी प्राधान्य देतात; परंतु कोकण रेल्वे मार्गावर एकच मार्गिका असल्याने आणि कोकणात अनेक गाड्यांना थाबे दिले जात नसल्याने कोकणातील रेल्वे प्रवाशांना फायदा होत नाही. आता वंदे भारत ट्रेनही धावणार आहे. त्यामुळे या मार्गावरून प्रवास करणाऱ्यांना मोठा दिलासा मिळणार आहे. मात्र, दिवसेंदिवस गाड्यांची संख्या वाढत असल्याने त्यांचा वेग मंदावत आहे. समोरून येणारी गाडी जाईपर्यंत दुसरी गाडी स्थानकात दहा-पंधरा मिनिटे थांबवावी लागत आहे. त्यामुळे कोकण रेल्वेच्या दुपदरीकरणाचा प्रस्ताव तयार केला आहे. त्यानुसार तब्बल २९ हजार कोटी रुपयांचा खर्च अपेक्षित आहे. मात्र कोकण रेल्वेची सध्याची आर्थिक परिस्थिती पाहता सदरचा खर्च त्यांच्या आवाक्याबाहेरचा आहे. त्यामुळे केंद्र सरकारने दरवर्षी केंद्रीय अर्थसंकल्पात पुढील तीन वर्षे दहा-दहा हजार कोटी रूपयांच्या निधीची तरतूद करावी किंवा केंद्रीय रेल्वेत विलीनीकरण करावे, अशी मागणी शिवसेना (उद्धव बाळासाहेब ठाकरे) खासदार विनायक राऊत यांनी केली आहे.