कल्याणमध्ये फ्री स्टाईल हाणामारी

सकाळ वृत्तसेवा
डोंबिवली, ता. ६ : कल्याणच्या पत्रीपुलाजवळ दोन दुचाकींची धडक झाल्याच्या कारणावरून दोन्ही दुचाकीस्वारांमध्ये हाणामारीचा प्रकार घडला. दोन्ही दुचाकीस्वार आणि त्यांच्या सोबत असलेल्या महिलांमध्ये फ्री स्टाईल हाणामारीचा व्हिडीओ सध्या समाजमाध्यामावर व्हायरल होत आहे. तब्बल वीस मिनिटे ही हाणामारी सुरू होती. अखेर पोलिसांच्या मदतीनंतर ही परिस्थिती नियंत्रणात आली. कल्याण पूर्व आणि पश्चिमेला जोडणारा तिसाई माता पूल (पत्रीपूल) ते दुर्गाडी किल्ल्याला जोडणाऱ्या गोविंद बायपास रोडवर मंगळवारी सायंकाळी साडेसात वाजण्याच्या सुमारास ही घटना घडली. दोन दुचाकींची धडकेनंतर चूक कोणाची हे न पाहता दोन्ही दुचाकीस्वारांमध्ये भररस्त्यातच तुंबळ हाणामारी सुरू झाली. ही सर्व घटना वाहतूक पोलिसांसमोरच घडत होती. दरम्यान महिलांचे भांडण सोडवण्यासाठी इतर प्रवासी प्रयत्न करत होते, या वेळी बघ्यांची मोठी गर्दी झाली.