अवघ्या ६६ दिवसांत २०० कोटींचा विक्रम

सकाळ वृत्तसेवा
ठाणे, ता. ७ : मालमत्ता कराच्या पहिल्या तिमाहीत ठाणे महापालिकेने आर्थिक वर्षाच्या ६६ दिवसांत २०० कोटी रुपयांची विक्रमी मालमत्ता करवसुली केली आहे. ठाणेकरांनी मालमत्ता कर भरणा करण्यास दिलेला अभूतपूर्व प्रतिसाद दिल्याने या आर्थिक वर्षात ९०० कोटींच्या वसुली टार्गेटचा टप्पा गाठणे शक्य होणार आहे; पण हा टप्पा केवळ गाठायचा नाही, तर जास्तीचे प्रयत्न करून एक हजार कोटी मालमत्ता करवसुली करण्याचे ‘बुस्टर’ आयुक्तांनी दिले आहे.
कोरोनाकाळापासून ठाणे महापालिका आर्थिक चणचणीचा सामना करत आहे. कंत्राटदारांची देणी देणे सोडाच, पण दर महिन्याला पालिका कर्मचाऱ्‍यांचे वेतन काढण्यासाठीही तारेवरची कसरत करावी लागत आहे. यावर मार्ग काढण्यासाठी पालिका आयुक्तांनी करवसुलीवर भर दिला आहे. त्यासाठी २०२३-२४ या आर्थिक वर्षात मालमत्ताकरापोटी ९०० कोटींचे टार्गेट देण्यात आले होते. ही करप्रणाली अधिक सोपी व्हावी, यासाठी नागरिकांना एसएमएसद्वारे अवगत केले होते. या एसएमएसद्वारे मालमत्ता कराची देयके डाऊनलोड करणे, प्रिंट करणे तसेच ऑनलाईन पद्धतीने मालमत्ता कर भरण्याकरिता अद्ययावत सुविधा उपलब्ध करून देण्यात आली होती. याला नागरिकांनी उत्स्फूर्त प्रतिसाद दिला आहे.
मालमत्ता कर नागरिकांना भरणे सोईचे व्हावे, यासाठी सर्व प्रभाग समिती कार्यालयात करसंकलन केंद्रे कार्यान्वित करण्यात आली असून कार्यालयीन वेळेत तसेच सार्वजनिक सुट्टीच्या दिवशी सदर केंद्रे सुरू ठेवण्यात आली आहेत. मालमत्ता कराची देयके प्रभाग समितीनिहाय सर्व मालमत्ताधारकांना वितरित करण्यात असून सदर मालमत्ता देयके संबंधितांना प्राप्त झाली की नाही, याची खातरजमा करून कर भरणेबाबत आवाहन करण्यात आले. त्यामुळे पहिल्या ६६ दिवसांतच २०० कोटींचा मालमत्ताकर पालिका तिजोरीत जमा झाला आहे. मालमत्ता कराची वसुलीबाबत सातत्याने नागरिकांमध्ये जनजागृती करण्यात येत असून यावर्षी १००० कोटींची वसुली करण्याचा प्रयत्न करावी, अशी अपेक्षा आयुक्त अभिजीत बांगर व्यक्त केली आहे.

गेल्या वर्षीच्या तुलनेत ९० टक्के वाढ
सन २०२२-२३ या आर्थिक वर्षात दिनांक ७ जून २०२२ रोजी १०८.३५ कोटींची वसुली झाली होती. त्या तुलनेत यंदा ९२.२२ कोटी इतकी वाढीव वसुली म्हणजेच ९० टक्के इतकी आहे. या वर्षी आतापर्यंत एकूण १,५१,५३६ इतक्या मालमत्ताधारकांनी कर भरणा केलेला आहे.

करवसुलीसाठी उपाययोजना
ठाणे महानगरपालिका क्षेत्रातील सर्व नागरिक/ करदात्यांना मालमत्ता करसंलग्न सोयीसुविधा ऑनलाईन पद्धतीने उपलब्ध करून देण्यात आल्या आहेत. यामध्ये करदाते त्यांच्या घरातून अथवा कार्यालयातून इतर ठिकाणाहून मालमत्ता करसंलग्न सर्व सोई-सुविधा वापरू शकतील. आपल्या मालमत्तेवर किती कर प्रलंबित आहे, जर दंड लागू करण्यात आला असेल, तर त्याची रक्कम किती आहे, मालमत्ता कर भरणा कोणकोणत्या पध्दतीने करता येईल, अशा सर्व प्रश्नांची उत्तरे नागरिकांना महानगरपालिकेच्या वेबसाईटद्वारे घरच्या घरी मिळू शकतील, अशी व्यवस्था करण्यात आली आहे. कोणत्याही प्रकारच्या माहितीसाठी महानगरपालिकेच्या कार्यालयात येण्याची व कोणास भेटण्याची गरज पडू नये, अशा पद्धतीने प्रक्रिया सुलभ होईल, याकडे विशेष लक्ष देण्यात आले आहे. त्याशिवाय, ऑनलाईन कर भरणा सुविधाही कार्यरत आहे.

प्रभाग समिती
करभरणा (कोटींमध्ये) - २०२३-२४ - सन २०२२-२३
माजिवडा मानपाडा - ६६.०४ - २६.४७
वर्तकनगर - ४२.४० - २६.५३
नौपाडा कोपरी - २९.८१ - १७.७९
उथळसर - १६.५७ - ९.६१
लोकमान्य-सावरकरनगर - ९.९७ - ३.४८
कळवा - ७.५४ - ३.२७
दिवा - ६.६९ - ३.१६
वागळे - ७.२४ - २.९५
मुंब्रा - ७.१६ - ३.८७
मुख्यालय - ७.१५ - ११.२२

असा झाला करभरणा
ऑनलाईन : ८५.६७ कोटी
धनादेश : ८३.३९ कोटी
रोख : २२.६७ कोटी
डीडी : १४.२० कोटी
कार्ड पेमेंट : ०.१९ कोटी