ठाण्यातील चार विधानसभेत ८१ उमेदवारांचे अर्ज

ठाण्यातील चार विधानसभेत ८१ उमेदवारांचे अर्ज
अर्ज छाननीत आठ अर्ज अवैध
सकाळ वृत्तसेवा
ठाणे, ता. ३१ : विधानसभा निवडणुकीची रणधुमाळी सुरू झाली आहे. त्यात ठाणे जिल्ह्यातील चार विधानसभा मतदारसंघात विविध राजकीय पक्षांसाह अपक्ष अशा ८१ उमेदवारांनी आपले उमेदवारी अर्ज दाखल केले. त्यात बुधवारी (ता. ३०) अर्ज छाननीच्या वेळी आठ अर्ज अवैध ठरले असून ७३ उमेदवारांचे अर्ज वैध ठरले आहेत. विशेष म्हणजे ओवळा-माजिवडा मतदारसंघातील दोन उमेदवारांचे अर्ज पक्षाचा एबी फॉर्म नसल्यामुळे रद्द ठरले होते; मात्र त्यांचे अर्ज अपक्ष म्हणून वैध ठरल्याने या मतदारसंघातील एकही अर्ज अवैध ठरला नसल्याची माहिती सूत्रांनी दिली.

ठाणे जिल्ह्यातील विधानसभा निवडणुकीची रणधुमाळी सुरू झाली आहे. अशातच महत्त्वाच्या राजकीय पक्षांकडून मोठे शक्तिप्रदर्शन करीत उमेदवारी अर्ज दाखल केले. नामनिर्देशन अर्ज दाखल करण्याची प्रक्रिया पूर्ण झाली आहे. जिल्ह्यात १८ लोकसभा मतदारसंघासाठी २२ ऑक्टोबरपासून नामनिर्देश अर्ज दाखल व वितरित करण्याची प्रक्रिया सुरू झाली. उमेदवारी अर्ज दाखल करण्याची अंतिम तारीख २९ ऑक्टोबर होती. या कालावधीत ठाणे शहर, ओवळा-माजिवडा, कोपरी- पाचपाखाडी आणि मुंब्रा-कळवा या चार विधानसभा मतदारसंघातून ८१ उमेदवारांनी नामनिर्देशन अर्ज दाखल केले आहेत. यात काही उमेदवारांनी दोन, तर काही उमेदवारांनी चार-चार अर्ज दाखल केल्याची माहिती जिल्हा प्रशासनाने दिली, तर बुधवारी अर्ज छाननी प्रक्रियेत आठ उमेदवारी अर्ज अवैध, तर ७३ उमेदवारी अर्ज वैध ठरल्याची माहिती जिल्हा प्रशासनाने दिली; मात्र अर्ज माघारीनंतरच प्रत्यक्ष निवडणुकीच्या मैदानात किती उमेदवार एकमेकांसमोर उभे ठाकतील, हे स्पष्ट होणार आहे.

ओवळा-माजिवड्यात सर्वच अर्ज वैध
ओवळा-माजिवडा मतदारसंघातून १७ उमेदवारांनी आपले उमेदवारी अर्ज दाखल केले होते. त्यापैकी दोन नामनिर्देशन अर्जासोबत पक्षाचा एबी फॉर्म दाखल न केल्यामुळे रद्द केला होता; मात्र त्यांचा अर्ज अपक्ष म्हणून ग्राह्य धरण्यात आल्याने या मतदारसंघातून एकही उमेदवारी अर्ज अवैध ठरला नाही, अशी माहिती निवडणूक विभागाने दिली.