पनवेल मतदारसंघात ईव्हीएमचे प्रशिक्षण

पनवेल, ता. ३१ (बातमीदार) : जिल्हाध‍िकारी व जिल्हा निवडणूक अध‍िकारी रायगड यांच्या आदेशानुसार पनवेल विधानसभा मतदारसंघामधील जवळपास तीन हजार मतदान अधिकारी व कर्मचाऱ्यांना प्रशिक्षण देण्यात आले. २६ व २७ ऑक्टोबर रोजी दोन सत्रांत शेडूंग येथील छत्रपती शिवाजी महाराज विद्यापीठात दृक-श्राव्य प्रशिक्षण व ईव्हीएम हॅण्ड्स ऑन ट्रेनिंग निवडणूक निर्णय अधिकारी पवन चांडक व सहाय्यक निवडणूक निर्णय अधिकारी विजय पाटील यांच्या मार्गदर्शनाखाली पार पडले.
निवडणूक प्रक्रिया प्रशिक्षण कार्यक्रमात अधिकारी, कर्मचारी यांना निवडणूक कर्तव्याबाबत व ईव्हीएमबाबत तांत्रिक प्रशिक्षण देण्यात आले. प्रशिक्षणाच्या ठिकाणी मतदान अधिकारी, कर्मचारी यांची गैरसोय होऊ नये म्हणून जागोजागी दिशादर्शक फलक, हजेरी नियोजन फलक लावण्यात आले होते, तसेच वैद्यकीय पथकाचीदेखील प्रशिक्षणाच्या ठिकाणी उपलब्धता होती. प्रशिक्षणार्थींच्या पार्किंगसाठी व्यवस्था करण्यात आली होती. प्रशिक्षण ठिकाणी मतदान अधिकारी, कर्मचारी यांना उन्हाचा त्रास होऊ नये म्हणून कूलर व फॅनची व्यवस्था चांगल्या प्रकारे करण्यात आलेली होती, तसेच प्रशिक्षणासाठी आलेल्या सर्व प्रशिक्षणार्थींना पिण्याच्या पाण्याची व्यवस्था, चहा, पाणी व नाश्‍त्याची व्यवस्था करण्यात आलेली होती. निवडणूक निर्णय अधिकारी पवन चांडक यांनी साध्या व सोप्या भाषेमध्ये निवडणूक कर्तव्याबाबत प्रशिक्षण दिले. ईव्हीएम हाताळणी कशी करावी, याबाबत सर्व निवडणूक क्षेत्रिय अधिकारी व मास्टर ट्रेनर्स यांनी काम पाहिले; तर व्यवस्थापक म्हणून तहसीलदार विजय पाटील व त्यांचे सहकारी नायब तहसीलदार संभाजी शेलार यांनी कामकाज सांभाळले.