पुन्हा संधी मिळाल्यास आणखी योजना राबवेन

पुन्हा संधी मिळाल्यास आणखी योजना राबवेन
मुख्यमंत्री एकनाथ शिंदे यांचे प्रतिपादन
सकाळ वृत्तसेवा
ठाणे, ता. ३१ : राज्यात विकासकामे करण्याचे काम सरकारने केले आहे, हाच आमचा अजेंडा आहे. यापूर्वीचे सरकार असताना राज्य तिसऱ्या क्रमांकावर गेले होते. आमचे सरकार आल्यानंतर राज्याला प्रत्येक क्षेत्रात पहिल्या क्रमांकावर आणल्याचे मुख्यमंत्री एकनाथ शिंदे यांनी म्हटले. मासुंदा तलाव परिसरात विविध संस्थांकडून आयोजित केलेल्या दिवाळी पहाट कार्यक्रमांना मुख्यमंत्री एकनाथ शिंदे यांनी उपस्थिती लावली. या वेळी ते बोलत होते.

आताची पिढीही आपले उत्सव आणि परंपरा पुढे नेत आहे, याचा आनंद जास्त आहे. कारण, आपला देश तरुणाईचा देश आहे. सांस्कृतिक वसा आणि वारसा जोपासण्याचे काम हे आपण करत आहोत. धर्मवीर आनंद दिघे यांनी अनेक उत्सव सुरू केले आणि ते उत्सव पुढे नेण्याचे काम आपण सुरू ठेवले, असेही त्यांनी सांगितले. राज्यात विकासकामे, कल्याणकारी योजना, उद्योग यांची सांगड घालून विकासात्मक कामे सरकारच्या माध्यमातून करण्यात येत आहेत. लाडकी बहीण योजना गावोगावी सुपरहिट झाली असून इतर घटकांसाठीही योजना राबविल्या आहेत. आणखी काही योजना माझ्या डोक्यात असून राज्यात सत्तेवर येण्याची पुन्हा संधी मिळाली, तर तुमच्यासाठी आणखी योजना राबवेन, अशी ग्वाहीदेखील मुख्यमंत्री एकनाथ शिंदे यांनी दिली. एकदा जे मी बोलतो, ते करतो. जे होणार आहे, तेच बोलतो. यामुळेच आमच्या सरकारने घोषणा केलेल्या योजना कागदावर राहिल्या नाहीत, तर त्या प्रत्यक्ष सुरू झाल्या आहेत, असेही ते म्हणाले.

दरम्यान, राज्याच्या मुख्यमंत्रिपदावर काम करण्यासाठी कमी कालावधी मिळाला, पण या कालावधीत सर्वाधिक कामे करण्याचा मान माझ्यासारख्या कार्यकर्त्याला मिळाला. जनतेने आमदार बनवले आणि यामुळेच मी राज्याचा मुख्यमंत्री होऊ शकलो. त्यामुळे माझ्या कामांचे श्रेय हे जनतेचे असल्याचेदेखील शिंदे यांनी या वेळी सांगितले. सीएम म्हणजे काॅमन मॅन. त्यामुळे कुणालाही भेटतो. कोणताही प्रोटोकाॅल नाही. सर्वांना भेटण्यासाठी उपलब्ध असतो, हीच माझी ओळख असल्याचे त्यांनी सांगितले.