षड्‍यंत्र रचून तिकीट कापले!

षड्‍यंत्र रचून तिकीट कापले!
श्रीनिवास वनगा तीन दिवसांनी घरी परतले

मनोर, ता. ३१ ः शिंदे सेनेने विधानसभेची उमेदवारी नाकारल्याने नाराज होऊन अज्ञातवासात गेलेले आमदार श्रीनिवास वनगा तिसऱ्या दिवाशी घरी परतले. ते आज (ता. ३१) सकाळी त्यांच्या कवाडा गावातील निवासस्थानी दाखल झाले. यावेळी बोलताना त्यांनी, षडयंत्र रचून तिकीट कापल्याचा आरोप केला. ते काल मध्यरात्री तीन वाजताच्या सुमारास घरी येऊन आपल्या पत्नीशी चर्चा करून नातेवाइकांकडे निघून गेले होते.
मुख्यमंत्र्यांच्या बंडात सहभाग असलेल्या एकाही आमदाराला डावलणार नाही, असे एकनाथ शिंदे यांनी जाहीर केले होते; परंतु षड्‍यंत्र रचून माझे तिकीट कापण्यात आले. आमदार म्हणून गेली पाच वर्षे मतदारसंघात प्रामाणिक काम केले. तिकीट नाकारल्यानंतर रागाच्या भरात बाहेर गेलो होतो. माझ्या जाण्यामुळे संपूर्ण कुटुंब डिस्टर्ब झाले. किती दिवस बाहेर राहणार... अखेर घरी येण्याचे ठरवले आणि घरी परतलो. पद आणि आमदार नसलो तरीही जगात खूप काही करण्यासारखे आहे. पद असेल- नसेल तरीही काम करीत राहणार आहे, असे ते म्हणाले. राजकारणात प्रामाणिकपणे काम करणाऱ्यांचे दिवस नाहीत. विधान परिषदेतबाबत आशा नाही; परंतु दिल्यास स्वीकारेन. या निवडणुकीत महायुतीचे काम करणार आहे, असेही त्यांनी सांगितले. दरम्यान, तिकीट नाकारल्यानंतर मी भावनेच्या भरात आरोप केले. दरम्यानच्या काळात शंभूराजे देसाई यांच्यासोबत बोलणे झाले. त्यांना मी शिवसेनेसोबत राहीन, असे आश्वासन दिले आहे, असेही वनगा म्हणाले.
...
कुंदन संखे यांच्यावरील आरोप
जिल्हाप्रमुख कुंदन संखे यांना त्यांच्या मर्जीतील उमेदवार हवा होता. त्यामुळे त्यांनी माझ्याविरोधात कार्यकर्त्यांना भडकावले, अशाप्रकारे खोटे काम करणाऱ्यांविरोधात मुख्यमंत्री एकनाथ शिंदे नक्कीच कारवाई करतील, असे श्रीनिवास वनगा यांनी सांगितले.
...
विधानसभा निवडणुकीत पालघर जिल्ह्यातील पक्षाच्या उमेदवारीबाबतचे निर्णय नेत्यांच्या स्तरावर झाले. निर्णय प्रक्रियेत माझा सहभाग नसतो. मी एक छोटा कार्यकर्ता आहे.
- कुंदन संखे, जिल्हाप्रमुख, शिवसेना शिंदे गट