काँग्रेसच्या रवी राजा यांचा भाजपमध्ये प्रवेश

काँग्रेसच्या रवी राजा यांचा भाजपमध्ये प्रवेश
पक्षाच्या मुंबई उपाध्यक्षपदाची जबाबदारी

सकाळ वृत्तसेवा
मुंबई, ता. ३१ ः मुंबई महापालिकेचे माजी विरोधी पक्षनेते आणि काँग्रेसचे माजी नगरसेवक रवी राजा यांनी सायन कोळीवाडा या मतदारसंघातून उमेदवारी न मिळाल्यामुळे काँग्रेस पक्षाचा राजीनामा देऊन भाजपमध्ये प्रवेश केला. त्यांच्यावर मुंबई भाजपच्या उपाध्यक्षपदाची जबाबदारी सोपविली आहे. उपमुख्यमंत्री देवेंद्र फडणवीस यांनी त्यांचे स्वागत केले.
मुंबई महापालिकेत रवी राजा यांनी विरोधी पक्षनेते असताना सत्ताधारी पक्षाच्या चुकीच्या धोरणावर प्रखर टीका केली होती. सायन कोळीवाडा विधानसभा मतदारसंघातून ते इच्छुक होते. येथून काँग्रेसचे गणेश यादव यांना उमेदवारी दिली. त्यामुळे नाराज झालेले रवी राजा यांनी राजीनामा दिला. काँग्रेसचे नेते मल्लिकार्जून खर्गे यांना पत्र पाठवून आपली नाराजी राजीनामा पत्रात कळविली होती. रवी राजा यांनी भाजप प्रवेश करताना काँग्रेस पक्षश्रेष्ठींबद्दल खंत व्यक्त केली. ते म्हणाले की, ‘‘मी काँग्रेसमध्ये ४४ वर्षे निष्ठेने काम केले आहे. काँग्रेस पक्ष वाढविला. जेव्हा उमेदवारी देण्याची वेळ आली, तेव्हा डावलण्यात आले. त्यामुळे मी पक्ष सोडण्याचा निर्णय घेतला आहे. मी भाजपमध्ये प्रवेश करताना कोणत्याही अटी घातलेल्या नाहीत.’’ उपमुख्यमंत्री देवेंद्र फडणवीस आणि भाजपचे मुंबईचे अध्यक्ष आशीष शेलार, सायन कोळीवाड्याचे भाजपचे उमेदवार तमिळ सेल्वन या वेळी उपस्थित होते. रवी राजा यांच्यासमवेत काही पदाधिकाऱ्यांनीही भाजपमध्ये प्रवेश केला.
...
भाजपला फायदा होईल!
रवी राजा यांच्या पक्षप्रवेशानंतर उपमुख्यमंत्री देवेंद्र फडणवीस म्हणाले, ‘‘रवी राजा यांनी विरोधी पक्षनेता म्हणून महापालिका गाजवली. मावळत्या महापालिकेचे विरोधी पक्षनेते म्हणून त्यांनी आक्रमक भूमिका मांडली. काँग्रेस पक्षात त्यांचा मोठा कनेक्ट आहे. ज्या लोकांनी मुंबईत काँग्रेस टिकवून ठेवली, त्यांच्यापैकी ते एक आहेत. ते आमच्याकडे आल्यामुळे त्यांचा निश्चित आम्हाला फायदा होईल.’’