गोपाळ शेट्टी यांच्या मनधरणीचे भाजपचे प्रयत्न असफल

गोपाळ शेट्टी यांच्या मनधरणीचे भाजपचे प्रयत्न असफल

सकाळ वृत्तसेवा
मुंबई, ता. ३१ ः बोरिवली विधानसभा मतदारसंघातील भाजपचे बंडखोर उमेदवार गोपाळ शेट्टी यांच्या मनधरणीचे प्रयत्न असफल ठरल्याचे समजते. शेट्टी हे आपल्या उमेदवारीवर ठाम असून त्यांनी बैठकांचा धडाका लावला आहे. त्यामुळे भाजपमध्ये अस्वस्थता निर्माण झाली असल्याचेही कळते.
उत्तर मुंबईचे भाजपचे माजी खासदार गोपाळ शेट्टी यांना नुकत्यात झालेल्या लोकसभा निवडणुकीत डावलून पियूष गोयल यांना उमेदवारी देण्यात आली. आता विधानसभेलाही त्यांना डावलण्यात आले आहे. त्यामुळे त्यांनी बोरिवली विधानसभा मतदारसंघातून अपक्ष उमेदवार म्हणून अर्ज भरला आहे. त्यांनी बंडखोरी केल्यानंतर त्यांची मनधरणी करण्याचे भाजपचे प्रयत्न सुरू आहेत; मात्र शेट्टी आपल्या निर्णयावर ठाम आहेत. त्यांनी आपला प्रचार सुरू ठेवला आहे. कार्यकर्त्यांच्या बैठका सुरू आहेत. त्यामुळे भाजपमध्ये अस्वस्थता असल्याचे समजते.
मुंबईतील भाजपचा गड मानला जाणाऱ्या बोरिवली मतदारसंघाला खिंडार पडल्याची स्थिती शेट्टी यांच्या उमेदवारीने निर्माण झाली आहे. भाजपने संजय उपाध्याय यांना उमेदवारी दिली. आता गोपाळ शेट्टी यांच्यामुळे उपाध्याय अडचणीत आले असल्याची चर्चा या मतदारसंघात आहे. या मतदारसंघात शेट्टी यांना डावलण्यात आल्यामुळे मतदारांमध्ये नाराजीचा सूर उमटत आहे. भाजपचे नेते आशीष शेलार यांनी शेट्टी यांच्या निवासस्थानी जाऊन मनधरणी करण्याचा प्रयत्न केला; मात्र त्यांना यश आले नाही. भाजपच्या वरिष्ठ पातळीवर त्यांची मनधरणी करण्याचे प्रयत्न सुरू असून शेट्टी आपल्या भूमिकेवर ठाम असल्याचे समजते.