ठाणे कारागृहात ‘स्वरमयी’ पहाट

ठाणे शहर, ता. ३१ (बातमीदार)ः बंदी जेव्हा कारागृहाबाहेर जातील, त्यांच्या कुटुंबांसोबत नव्या आयुष्याची सुरुवात करतील तो दिवस त्यांच्या आयुष्यातील खरी दिवाळी पहाट असेल, अशा शुभेच्छा ठाणे जिल्हाधिकाऱ्यांनी ठाणे मध्यवर्ती कारागृहातील बंद्यांना दिल्या. कारागृह प्रशासनाच्या गुरुवारी झालेल्या संगीतमय कार्यक्रमाला प्रमुख अतिथी म्हणून जिल्हाधिकारी अशोक शिनगारे यांनी उपस्थिती लावली होती.
देशभरात दिवाळीचा उत्साह आहे. ठाणे मध्यवर्ती कारागृह प्रशासनाने हा सण साजरा करताना कारागृहातील बंद्यांसाठी गुरुवारी (ता. ३१) दिवाळी पहाटचा संगीतमय कार्यक्रम घेतला. या कार्यक्रमांमध्ये सूर ताल ऑर्केस्ट्राच्या कलाकारांनी विविध देशभक्तिपर गीते, गणेश वंदन, मेरा नाम जोकर, मोहम्मद रफी व लता दिदी यांची प्रसिद्ध सुमधुर गीतांचा नजराणा सादर केला. तर, कारागृहातील काही बंध्यांनी सादर केलेले ‘राहत फतेअली खान यांची रश्के कदम, मिलना जरुरी था, दिवाना हूं मै, मेरा खत है’, यांसारख्या गीतांचे गायन करून उपस्थितांची मने जिंकली. सेवाधाम कम्युनिटी सर्व्हिसेस, ठाणे या अशासकीय संस्थेच्या सहकार्याने हा कार्यक्रम सादर करण्यात आला. या कार्यक्रमासाठी ठाणे मध्यवर्ती कारागृह अधीक्षक राणी भोसले, कारागृह महानिरीक्षक प्रशांत बुरडे, विशेष पोलिस महानिरीक्षक कारागृह डॉ. जालिंदर सुपेकर, कारागृह उपमहानिरीक्षक योगेश देसाई उपस्थित होते.