महाबोधी महाविहारासाठी शांतता रॅली

शहापूर (वार्ताहर) : बिहार राज्यातील बोधगया महाबोधी महाविहार मुक्त करावे, महाबोधी महाविहार कायदा बीटी ॲक्ट १९४९ रद्द करावा, बोधगया येथील महाबोधी महाविहार बौद्धेत्तरांच्या ताब्यातून मुक्त करून बौद्धांच्या ताब्यात द्यावे आणि महाविहार परिसरात होणाऱ्या कर्मकांडांवर प्रतिबंध घालावेत, या मागणीकरिता मंगळवारी शहापूर शहरातून शांतता महारॅली काढण्यात आली. संत तुकाराम चौकातून पायी चालत निघालेल्या रॅलीची तहसीलदारांना निवेदन देऊन सांगता झाली. भिक्खू संघाने आंदोलन सुरू केले आहे; परंतु अद्यापपर्यंत बिहार सरकार किंवा केंद्र सरकार कुठलाही निर्णय घेण्यास अथवा हस्तक्षेप करण्यास तयार नाहीत. पोलिस बळाचा वापर करून नाहक त्रास देत आहे. त्यामुळे संविधानाच्या माध्यमातून सर्व धर्मांना धर्मस्वातंत्र्य असताना बौद्धांच्या बाबतीत वेगळा न्याय का, असा सवाल रॅलीतून उपस्थित करण्यात आला. या महारॅलीत शहापूर तालुक्यातील सर्व आंबेडकरी विचारधारेचे राजकीय पक्ष तसेच सर्व सामाजिक, धार्मिक, संस्था आणि संघटनांचे पदाधिकारी मोठ्या संख्येने सहभागी झाले होते.