श्रीवर्धनच्‍या तहसीलदारांकडून आदिवासी मुलाला शासकीय मदत

श्रीवर्धनच्‍या तहसीलदारांकडून आदिवासी मुलाला शासकीय मदत
श्रीवर्धन, ता. २६ (बातमीदार) : प्रशासनातील अधिकारी संवेदनशील असतील, तर समाजातील दुर्बल घटकांच्या आयुष्याला नवी दिशा मिळू शकते, याचे उत्तम उदाहरण श्रीवर्धनचे तहसीलदार महेंद्र वाकलेकर यांनी घालून दिले आहे. तालुक्यातील वडवली येथील एका अनाथ आदिवासी मुलाला त्यांनी रेशन कार्ड मिळवून दिले.
गणेश वाघमारे हा लहानपणीच आई-वडिलांना गमावून पूर्णपणे अनाथ झाला. त्यावेळी गावातील प्रभाकर आणि प्रेमळ चौलकर या दांपत्याने त्याला आपला मुलगा मानून स्वीकारले आणि शिक्षणासाठी शाळेत दाखल केले. मात्र कोविड काळात प्रभाकर चौलकर यांचे निधन झाले. त्यानंतर प्रेमळ चौलकर यांनी एकटीने गणेशचे संगोपन सुरू ठेवले. गणेश सध्या इयत्ता पाचवीत शिकत आहे. शिष्यवृत्ती मिळण्यासाठी रेशन कार्ड आवश्यक असल्याचे समजल्यावर प्रेमळ चौलकर यांनी मदतीसाठी आगरी समाज वडवली माजी अध्यक्ष संतोष भायदे यांच्याशी संपर्क साधला. त्यांनी दिव्यांग संघटनेचे अध्यक्ष निलेश नाक्ती यांच्या मदतीने तहसीलदार वाकलेकर यांची भेट घेतली व संपूर्ण परिस्थिती सांगितली. कोणतेही अधिकृत पुरावे नसतानाही, केवळ आधार कार्ड, तलाठी अहवाल व पंचनाम्यावर विश्वास ठेवत तहसीलदार वाकलेकर यांनी मानवतेचा धर्म पाळत गणेशसाठी रेशन कार्ड तयार करून दिले. तसेच शासनाची ‘अंत्योदय योजना’ लागू करून दरमहा २५ किलो तांदूळ आणि १० किलो गहू मोफत मिळण्याची सोय केली. याखेरीज ‘संजय गांधी निराधार योजना’ अंतर्गत दरमहा १५०० रुपये मिळण्यासाठीही मदत केली.