बोरघर स्मशानभूमीचे काम लवकरच मार्गी लागणार

बोरघर स्मशानभूमीचे काम लवकरच मार्गी लागणार
ग्रामस्‍थांच्या अंतर्गत वादामुळे कामाची रखडपट्टी
रोहा, ता. २० (बातमीदार) ः बोरघर गावातील स्मशानभूमीचा प्रश्न मागील अनेक महिन्यापासून प्रलंबित आहे. स्मशानभूमीअभावी ग्रामस्थांची प्रचंड गैरसोय होत आहे. भरपावसात ग्रामस्‍थांना अंत्यविधी करावा लागत आहे. या स्मशानभूमीच्या कामासाठी जिल्हा नियोजन समितीच्या बैठकीत निधी मंजूर करण्यात आला, मात्र तांत्रिक अडचण तसेच अंतर्गत वादामुळे हे काम रखडले. यावर लवकरच तोडगा काढण्यात येणार असल्याचे ग्रामपंचायतीच्या सदस्यांकडून सांगण्यात येत आहे. त्‍यामुळे डिसेंबरअखेरपर्यंत हे काम मार्गी लागणार असून, शासकीय पातळीवर यंत्रणा कामाला लागली असल्याचे बोलले जात आहे.
तळाघरजवळील बोरघर गावात सध्या उघड्यावर अंत्यविधी केला जात आहे. स्मशानभूमीचे शेड आणि सरण नसल्याने चार बाजूला चार लाखडी डांब उभे केले आहेत. त्‍यामुळे स्थानिकांना अनेक अडचणींचा सामना करावा लागत आहे. या ठिकाणी नवीन स्मशानभूमी व शेडचे काम व्हावे, अशी मागणी करण्यात आली होती. या कामासाठी जिल्हा नियोजन समितीच्या बैठकीत पाच लाख रुपयांचा निधीदेखील मंजूर करण्यात आला आहे. तसेच संबंधित ठेकेदाराला कामाचे आदेश देण्यात आले होते. मात्र गावपातळीवर वाद निर्माण झाल्याने हे काम प्रलंबित आहे. त्यामुळे या कामाला विलंब झाला असून, चर्चेच्या माध्यमातून हा वाद लवकर मिटणार असल्याचे बोलले जात आहे. त्यानंतर कामाला लगेच सुरुवात होईल, अशी माहिती ग्रामपंचायत सदस्य संजय भगत यांनी दिली.
...................
पाच लाख रुपयांचा निधी
बोरघर येथे स्मशानभूमी व निवारा शेडचे काम जिल्हा परिषदेच्या सार्वजनिक बांधकाम विभागामार्फत करण्यात येत आहे. या कामासाठी जिल्हा नियोजन समितीच्या बैठकीत पाच लाख रुपयांची वित्तीय मान्यता प्राप्त झाल्यानंतर संबधित ठेकेदाराला कामाचे लेखी आदेश देण्यात आले आहेत. काही तांत्रिक अडचण निर्माण झाल्यानंतर या कामाला मुदतवाढ देण्यात आली आहे. डिसेंबर २०२५पर्यंत हे काम पूर्ण केले जाईल. या कामासंदर्भात प्रशासन आणि ठेकेदार यांच्यात करारनामा झाल्याची माहिती रायगड जिल्हा परिषद बांधकाम विभागाचे उप अभियंता अनिल जांभळे यांनी दिली आहे.