उपनेते बाळा माने यांच्याकडून संघटन बांधणीचे धडे

उल्हासनगर, ता. २० (बातमीदार) : आगामी महापालिकेच्या निवडणुकीत शिवसेनेचे सर्वाधिक नगरसेवक कसे निवडून येऊ शकतात, या विषयी कानमंत्र देतानाच उल्हासनगरातील शिवसेना ठाकरे पक्षाच्या पदाधिकाऱ्यांना उपनेते बाळा माने यांनी संघटन बांधणीचे धडे दिले.
कल्याण जिल्हाप्रमुख धनंजय बोडारे यांच्या पुढाकाराने कॅम्प नंबर ४ मधील लुल्ला हॉलमध्ये निवडणुकीच्या पार्श्वभूमीवर मार्गदर्शन बैठक घेण्यात आली होती. त्या वेळी माने बोलत होते. महाराष्ट्रात शिवबंधन परिक्रमाची बांधणी सुरू असून, त्याला चांगला प्रतिसाद मिळत आहे, असेही माने म्हणाले. पदाधिकारी, महिला आघाडी, युवा सेना एकदिलाने पक्ष वाढवण्यासाठी आणि नागरिकांच्या अनेक समस्या सोडवण्यासाठी काम करत आहे. त्याचा सकारात्मक परिणाम येणाऱ्या महापालिका निवडणुकीत दिसणार आहे. शिवसेनेचे अधिकाधिक नगरसेवक निवडून येणार, असा विश्वास कल्याण जिल्हाप्रमुख धनंजय बोडारे यांनी व्यक्त केला.
कार्यक्रमात शिवसेना उत्तर भारतीय अध्यक्ष मनोज तिवारी यांच्या मार्गदर्शनाखाली बाळा माने, गुरुनाथ खोत, धनंजय बोडारे यांच्या उपस्थितीत शेकडोंच्या संख्येने तरुणांनी शिवसेनेत प्रवेश केला. या वेळी उपजिल्हाप्रमुख राजेंद्र शाहू, भीमसेन मोरे, महानगरप्रमुख राधाचरन करोतिया, युवा सेना कल्याण जिल्हाधिकारी भाऊ मात्रे, शहरप्रमुख कैलाश तेजी, शहरप्रमुख कुलविंदर सिंग बैस, उप विधानसभाप्रमुख शिवाजी जावळे, माजी नगरसेविका वसुधा बोडारे, महिला आघाडी संघटक जया तेजी, पदाधिकारी शेखर यादव, कृष्णा पुजारी, भगवान मोहिते, दिलीप मिश्रा, राजू माने, राजेश कणसे, संतोष हांडे, शाखाप्रमुख सहभागी झाले होते.