डोंबिवलीत भाजपची मोर्चेबांधणी

डोंबिवलीत भाजपची मोर्चेबांधणी
राजकीय पक्षांकडून महापालिकेची तयारी
सकाळ वृत्तसेवा
डोंबिवली, ता. २० : शहरातील पश्चिमेतील काँग्रेस, मनसेच्या कार्यकर्त्यांसह काही सामाजिक संघटना, मंडळाच्या पदाधिकाऱ्यांनी रविवारी भाजपमध्ये पक्षप्रवेश केला. भाजप प्रदेशाध्यक्ष रवींद्र चव्हाण यांच्या अध्यक्षतेखाली हा पक्षप्रवेश झाला. आगामी महापालिका निवडणुकीच्या पार्श्वभूमीवर सर्वच राजकीय पक्षांकडून मोर्चेबांधणीला सुरुवात केली आहे. त्या अनुषंगाने भाजपनेही निवडणुका डोळ्यासमोर ठेवून इतर पक्षातील कार्यकर्त्यांचे इनकमिंग सुरू केले आहे.

पक्षप्रवेशावेळी भाजपचे प्रदेशाध्यक्ष आणि आमदार रवींद्र चव्हाण यांनी म्हटले की, नवीन जिल्हाध्यक्ष नंदू परब यांच्या नेतृत्वाखाली अनेक विविध संघटना त्याचप्रमाणे काही पक्षातील कार्यकर्त्यांनी भाजपमध्ये प्रवेश करण्याची इच्छा दर्शवली होती. त्या अनुषंगाने भारतीय जनता पक्षाकडे हे इनकमिंग सुरू झाले आहे. भविष्यात अजूनही अनेक जण प्रवेश करण्याची शक्यता त्यांनी वर्तवली आहे. तसेच येत्या २२ जुलैला मुख्यमंत्री देवेंद्र फडणवीस यांचा वाढदिवस आहे. यानिमित्त संपूर्ण राज्यात रक्तदान शिबिराचे आयोजन केले आहे. डोंबिवलीत दोन ठिकाणी रक्तदान शिबिराचे आयोजन केले आहे, असे चव्हाण यांनी सांगितले.

कल्याण जिल्हाध्यक्ष नंदू परब, डोंबिवली मंडल अध्यक्ष पवन पाटील, मंडल अध्यक्षा प्रिया जोशी, मंडल अध्यक्ष मितेश पेणकर, समीर चिटणीस आणि इतर पदाधिकारी उपस्थित होते. काँग्रेस ब्लॉक अध्यक्ष शशिकांत (गणेश) चौधरी, महीला ब्लॉक अध्यक्ष गिता चौधरी, बाळा सावंत, मनसेचे सुभाष कदम विजय शिंदे, तसेच डोंबिवली पश्चिमेमधील मनीष मोरे, राजेश नाना भोईर, अनेक महिला मंडळं, सामाजिक मंडळे, समाजसेवकांनी प्रवेश केला.

विकासासाठी कटिबद्ध
डोंबिवली पश्चिमचे मंडळ अध्यक्ष पवन पाटील म्हणाले, महाराष्ट्राच्या विकासासाठी भाजप परिवार कटिबद्ध आहे, हे विविध पक्षांतील कार्यकर्त्यांना पटवून देण्यात यश येत आहे. पंतप्रधान नरेंद्र मोदी, मुख्यमंत्री देवेंद्र फडणवीस आणि यांच्या नेतृत्वावर विश्वास ठेवत भाजप परिवारामध्ये मोठ्या प्रमाणात प्रवेश होत आहेत, याचाच एक भाग म्हणून रविवारी (ता. २०) शेकडो कार्यकर्ते भाजपचे महाराष्ट्र प्रदेशाध्यक्ष रवींद्र चव्हाण यांच्या अध्यक्षतेखाली भाजप परिवारात सामील झाले आहेत.