कल्याण पूर्वेत नवीन जलवाहिनी

कल्याण पूर्वेत नवीन जलवाहिनी
१५ वर्षांची पाणी समस्या सुटली
सकाळ वृत्तसेवा
डोंबिवली, ता. २० : कल्याण ग्रामीणमधील नांदिवली लक्ष्मीनगर परिसरातील नागरिक मागील १५ वर्षांपासून पाण्याच्या समस्येने त्रस्त होते. नागरिकांची ही समस्या लक्षात घेता कल्याण-डोंबिवली महापालिकेच्या वतीने या परिसरात सहा इंची जलवाहिन्या टाकल्या आहेत. या वाहिन्यांचे रविवारी लोकार्पण करून नागरिकांना पाणीपुरवठा सुरू करण्यात आला. यामुळे नागरिकांमध्ये आनंदाचे वातावरण आहे.

कल्याण-डोंबिवली महापालिकेच्या प्रभाग क्र. १०६ मधील नांदिवली परिसरातील १५ वर्षांपासूनची पाणीटंचाईची समस्या अखेर संपुष्टात आली आहे. या समस्येविषयी नागरिकांनी शिवसेनेचे माजी शहरप्रमुख महेश गायकवाड यांच्याकडे म्हणणे मांडले होते. नागरिकांचे समस्या लक्षात घेत गायकवाड यांनी महापालिकेच्या पाणीपुरवठा विभागाकडे पाठपुरावा केला. पालिकेने तत्काळ कार्यवाही करत परिसरात सहा इंची जलवाहिन्या टाकल्या. या जलवाहिन्यांचा लोकार्पण सोहळा महेश गायकवाड यांच्या हस्ते नारळ फोडून पार पडला आणि जलप्रवाह सुरू करण्यात आला.

कार्यक्रमावेळी गायकवाड म्हणाले की, नांदिवली परिसरातील नागरिकांना गेल्या अनेक वर्षांपासून पाण्यासाठी त्रास सहन करावा लागत होता. ही समस्या कायमस्वरूपी सोडविण्यासाठी आम्ही सातत्याने पाठपुरावा केला. या लोकार्पणाने नांदिवलीतील पाणीप्रश्नावर कायमस्वरूपी तोडगा निघाला आहे, याचा मला आनंद आहे. लोकांच्या समस्या सोडवणे हीच आमची जबाबदारी आहे. या जलवाहिनी प्रकल्पासाठी सुमारे १५ लाखांचा खर्च अपेक्षित असतानाही कामासाठी लागणारा अतिरिक्त खर्च स्वतः उचलून या कार्याची पूर्तता करण्यास गायकवाड यांनी पुढाकार घेतला. त्यामुळे परिसरातील नागरिकांनी समाधान व्यक्त केले.