मुळ्ये प्रतिष्ठानकडून गुणवंत विद्यार्थ्यांचा सत्कार

नालासोपारा, ता. २० (बातमीदार) : वसई, विरार, नालासोपारा परिसरामधील दहावी-बारावीच्या गुणवंत विद्यार्थ्यांचा कै. माधवराव मुळ्ये प्रतिष्ठानकडून सत्कार करण्यात आला आहे. या वेळी विविध क्षेत्रांत समाजोपयोगी काम करणाऱ्या मान्यवरांना सन्मानचिन्ह देऊन त्यांचा सन्मान केला आहे. वसईच्या न्यू इंग्लिश शाळेच्या सभागृहात शनिवारी (ता. १९) या कार्यक्रमाचे आयोजन करण्यात आले होते. प्रमुख उपस्थिती म्हणून आमदार स्नेहा दुबे-पंडित, डॉ. रमेश गुप्ते, मयांक शेठ यांच्यासह अन्य मान्यवर उपस्थित होते.

स्नेहा दुबे-पंडित म्हणाल्या, की ज्या शाळेत मी शिकले, त्याच शाळेत आज आमदार म्हणून मी आली आहे, याचा मला अभिमान वाटतो. अधिवेशनात शेवटच्या दिवशी जो राडा झाला, त्यावर त्यांनी चिंता व्यक्त करीत म्हणाल्या, की विधानभवन हे लोकशाहीचे मंदिर आहे. या मंदिरात कायदे करण्यासाठी आमदार जातात, त्याच ठिकाणी आमदारांनीच कायदा हातात घेणे हे चुकीचे आहे. याठिकाणी लोकशाहीच्या मंदिराची प्रतिमा राखणे हे प्रत्येक आमदाराचे कर्तव्य आहे. आम्हा नवीन आमदारांसाठी हा नवीन अनुभव होता. या अधिवेशनात खूप काही शिकताही आले. त्यात चांगले आणि वाईट अनुभव आले आहेत.