भिवंडी ग्रामीणमधील शिवसेनेची मोर्चाबांधणी सुरू

भिवंडी, ता. २० (बातमीदार) : ठाणे जिल्हा परिषद व ग्रामपंचायतींच्या निवडणुकीचे आरक्षण सोडत काढण्याची प्रक्रिया राज्य सरकार आदेशानुसार महसूल विभागाने सुरू केल्याने सत्ताधारी भाजप व शिवसेनेच्या पक्ष कार्यकर्त्यांच्या बैठका सुरू केल्या आहेत. त्याचप्रमाणे शिवसेना ठाणे ग्रामीणमध्येही निवडणुका लक्षात घेऊन कशेळी शिवसेना पक्ष कार्यालयात कार्यकर्ते व पदाधिकाऱ्यांची बैठक आणि मेळावा झाला. या ठिकाणी भिवंडी शहर व ग्रामीण भागातील कार्यकर्त्यांना विविध पदांचे वाटप करत मोर्चाबांधणी सुरू केली आहे.
भिवंडी तालुक्यातील कशेळी शिवसेना पक्ष कार्यालयात जिल्हाप्रमुख देवानंद थळे यांच्या मेळावा कार्यक्रमाला उपनेते नीलेश सांबरे, अरुण पाटील, लोकसभा संपर्कप्रमुख मदन नाईक, भिवंडी पश्चिम शहरप्रमुख शाम पाटील, दिलीप नाईक यांच्यासह पदाधिकारी व कार्यकर्ते उपस्थित होते. ठाणे ग्रामीण जिल्ह्यामध्ये होणाऱ्या आगामी जिल्हा परिषद ग्रामपंचायतीच्या निवडणुका लक्षात घेऊन पक्षप्रमुख एकनाथ शिंदे यांच्या आदेशानुसार थळे यांनी पक्षाचे पदाधिकारी व कार्यकर्त्यांचा मेळावा आणि त्या अंतर्गत शिवसेना सदस्य मोहीमही सुरू केली आहे.
आगामी निवडणुका लक्षात घेऊन सर्व पदाधिकारी व कार्यकर्त्यांनी जास्तीत जास्त सदस्य नोंदणी करून पक्षबांधणी सुरू करावी आणि जिल्हा परिषदेवर भगवा फडकवा, असे आवाहन थळे यांनी केले. याप्रसंगी कोनगाव, पिंपळास, काल्हेर, कशेळी, अनगाव अशा विविध गावांतील युवकांनी पक्षात प्रवेश केला. यावेळी भिवंडी शहर व ग्रामीण भागातील सक्रिय पक्ष कार्यकर्त्यांना विविध पदांवर नियुक्त करण्यात आले.