रील, स्टोरीतून गुन्हेगारीचे समर्थन

अंबरनाथ, ता. २० (वार्ताहर) : अंबरनाथमध्ये एका मुलाने समाज माध्यमांवर शेअर केलेल्या रील आणि स्टोरीवर चाकूच्या फोटोमुळे परिसरात खळबळ उडाली आहे. या मुलांना पोलिसांनी योग्य दिशा दाखवून त्यांची गुन्हेगारीची नशा उतरवावी, अशी मागणी नागरिकांमधून केली जात होती. अखेर पोलिसांनी या व्हिडिओ बनवणाऱ्या मुलांना शोधून समज दिली आहे. त्यांचा आक्षेपार्ह व्हिडिओ हटवला असून माफीचा अपलोड केला.
इन्स्टाग्रामवर बद्री यादव या नावाने एक अकाउंट तयार करण्यात आले आहे. त्यावर त्याने एक रील शेअर करत आम्हाला पोलिस ठाण्याची केस आवडत असल्याचे म्हटले होते. याच अकाउंटवर स्टेटसला स्टोरी ठेवत त्यात चाकूचा फोटोही लावला होता. बॅकग्राऊंडला सरकार चित्रपटातील गाणे ठेवले. हे पाहिल्यानंतर अंबरनाथ शहरातील तरुणाई कोणत्या दिशेने चालली, असा प्रश्न उपस्थित झाला. शहरात सोल्युशन, व्हाईटनर हुंगत फिरणारी अल्पवयीन मुले सर्रास पाहायला मिळतात. हीच मुलं गुन्हेगारीकडेही वळू लागली असून पोलिसांनी या मुलांना समजेल, अशा भाषेत पोलिसांनी त्यांना समज द्यावी , अशी मागणी नागरिकांमधून केली जात होती. दरम्यान हा व्हिडीओ वायरल झाल्यानंतर आणि माध्यमातून बातम्या प्रसारित झाल्यानंतर अंबरनाथ पोलिसांनी या मुलांना शोधून काढले असून त्यांना समज दिली. तसेच त्यांचा गुन्हेगारीचा तो व्हिडीओ डिलीट करून माफीचा व्हिडीओ अपलोड केल्याची माहिती अंबरनाथ पोलिसांनी दिली.