हवाईसुंदरीवर लैंगिक अत्याचार

हवाईसुंदरीवर लैंगिक अत्याचार

भाईंदर, ता. २० (बातमीदार) : एका विमान कंपनीत हवाईसुंदरी म्हणून काम करणाऱ्या मिरा रोडमधील तरुणीवर तिच्याच सहकाऱ्याकडून लैंगिक अत्याचार करण्यात आल्याचे उघडकीस आले आहे. नवघर पोलिसांनी आरोपीला शनिवारी (ता. १९) अटक केली.
पीडित तरुणी व आरोपी एकाच विमानात कंपनीत कामाला असून दोघेही मिरा रोडमध्येच राहतात. दोघेही २९ जूनला लंडनची फेरी पूर्ण करून मुंबईत परतले. त्यानंतर दोघांनी मुंबईतील एका हॉटेलमध्ये पार्टी केली. उशीर झाल्याने पीडित तरुणी आरोपीच्या मिरा रोड येथील घरी गेली होती. त्या वेळी आरोपीने तिच्यावर बळजबरीने अत्याचार केला. झालेला प्रकार कोणालाही सांगू नको, असे आरोपी पीडितेला गेल्या काही दिवसांपासून धमकावत होता; मात्र पीडितेने धैर्य एकवटून नवघर पोलिस ठाण्यात तक्रार नोंदवली. त्यानंतर पोलिसांनी आरोपीला अटक केली.