इमारतीचा सज्जा कोसळून कामगाराचा जागीच मृत्यू

इमारतीचा सज्जा कोसळून कामगाराचा जागीच मृत्यू

उल्हासनगर, ता. २० (वार्ताहर) : उल्हासनगरातील फर्निचर मार्केट परिसरात दुरुस्तीच्या कामादरम्यान एका इमारतीचा सज्जा कोसळून एका कामगाराचा जागीच मृत्यू झाला. यामुळे नागरिकांनी अशा जर्जर इमारतींच्या सुरक्षेबाबत गंभीर प्रश्न उपस्थित केले आहेत.
उल्हासनगर शहरातील फर्निचर मार्केटजवळ असलेल्या जुन्या व धोकादायक अवस्थेतील इमारतीत रविवारी सायंकाळी साडेचारच्या सुमारास ही घटना घडली. मृत कामगाराचे नाव रावसाहेब ननावरे असे असून, ते या इमारतीच्या दुरुस्तीच्या कामासाठी काही दिवसांपासून तिथे कार्यरत होते. घटनेच्या वेळी रावसाहेब आणि इतर काही कामगार गल्लीत उभे राहून बांधकामाचं काम करत होते. अचानक वरून खिडकीचा मोठा सज्जा तुटून थेट रावसाहेब यांच्या डोक्यावर कोसळला. रावसाहेब यांना तातडीने उल्हासनगरमधील मध्यवर्ती रुग्णालयात हलवले; मात्र डॉक्टरांनी तपासणीअंती त्यांना मृत घोषित केले. घटनेनंतर महापालिकेचे आपत्कालीन पथक आणि पोलिस घटनास्थळी दाखल झाले आणि प्राथमिक पंचनामा सुरू केला. पोलिसांनी मृतदेह शवविच्छेदनासाठी पाठवला असून, दुर्घटनेमागचे नेमके कारण आणि जबाबदारी ठरवण्यासाठी अधिक तपास सुरू आहे.