प्रवीण दरेकर लिफ्टमध्ये अडकले

प्रवीण दरेकर लिफ्टमध्ये अडकले
दोन आमदारही होते सोबत

नालासोपारा, ता. २० (बातमीदार) : भाजप नेते प्रवीण दरेकर कार्यक्रमासाठी तिसऱ्या मजल्यावर जात असताना लिफ्टमध्ये १५ ते २० मिनिटे अडकून पडल्याची घटना रविवारी (ता. २०) घडली. पोलिस आणि भाजप कार्यकर्त्यांनी लिफ्टचे दार तोडून त्यांना बाहेर काढले. बाहेर निघाले तेव्हा ते घामाघूम झाले होते. मोठी दुर्घटना टळली आहे.
वसईच्या कौल हेरिटेज येथील हॉलच्या लिफ्टमध्ये ही घटना घडली. वसईच्या आमदार स्नेहा दुबे-पंडित यांनी सहकारी गृहनिर्माण संस्थांच्या इमारतींच्या स्वयंपुनर्विकासाबाबत मार्गदर्शन शिबिर ठेवले होते. या शिबिरासाठी प्रमुख मार्गदर्शक म्हणून दरेकर आले होते. कार्यक्रम हा तिसऱ्या मजल्यावर होता. तिसऱ्या मजल्यावर लिफ्टमधून जात असताना लिफ्टची क्षमता १० जणांची असताना १७ जण आत शिरल्याने लिफ्ट वर जाण्याऐवजी भूमिगत मजल्यावर जाऊन आपटली. तेथे लिफ्टमध्ये अडकल्याने सर्व जण घाबरून गेले होते. पोलिस, भाजप कार्यकर्त्यांनी तत्काळ प्रसंगावधान राखून लिफ्टचा दरवाजा तोडून सर्वांना बाहेर काढले. या वेळी आमदार राजन नाईक, आमदार स्नेहा दुबे-पंडित आणि भाजपचे पदाधिकारीही सोबत होते.
...
लिफ्टची आणि माझी काय दुश्मनी आहे माहीत नाही; पण लिफ्टमध्ये अडकण्याच्या घटना वारंवार घडतात. सुदैवाने कोणतीही दुर्घटना घडली नाही. थोडा त्रास झाला; पण सुखरूप बाहेर आलो.
- प्रवीण दरेकर, भाजप नेते