आमदार रोहित पवारांविरोधात गुन्हा

आमदार रोहित पवारांविरोधात गुन्हा

आझाद मैदान पोलिस ठाण्यातील गोंधळ भोवला

मुंबई, ता. २० : विधिमंडळाच्या लॉबीतील हाणामारी प्रकरणानंतर आझाद मैदान पोलिस ठाण्यात राष्‍ट्रवादी काँग्रेस शरदचंद्र पवार पक्षाचे आमदार रोहित पवार यांची पोलिसांशी बाचाबाची झाली होती. याप्रकरणी आझाद मैदान पोलिस ठाण्यात रोहित पवार यांच्याविरुद्ध गुन्हा दाखल झाला आहे.

हाणामारी प्रकरणातील राष्‍ट्रवादी काँग्रेस (शरद पवार गट)चा कार्यकर्ता नितीन देशमुख यांना आझाद मैदान पोलिस ठाण्यात ठेवल्याचा समज होऊन पवार तेथे मध्यरात्री पोहोचले. या वेळी पोलिसांसोबत त्यांची जोरदार बाचाबाची झाली होती. त्याची चित्रफीत समाजमाध्यमावर फिरत होती. यात पवार पोलिसांवर आवाज चढवून बोलत असल्याचे दिसत आहे. यानंतर आझाद मैदान पोलिसांनी शनिवारी रात्री उशिरा रोहित पवार यांच्याविरुद्धही गुन्हा नोंदवला आहे.
----
कार्यकर्ते नितीन देशमुख यांना दोन महिन्यांपूर्वी शस्त्रक्रिया झालेल्या शरीरावर मारहाण झाली होती. त्यांची विचारपूस करण्यासाठी त्यांच्या भेटीची मागणी करत होतो; मात्र पोलिसांनी चार-पाच पोलिस ठाण्यात फिरवून उडवाउडवीची उत्तरे दिली. हातवारे करून अपमानास्पद वागणूक दिली. पोलिस प्रशासन कायद्याने कारवाई करणार असेल, तर सहकार्यच राहते. राजकीय आदेशाने वागणारे पोलिस लोकप्रतिनिधींनादेखील जुमानत नसतील तर काय करायचे?
- रोहित पवार, आमदार