अनधिकृत व्यापारी ठरला डोकेदुखी

अनधिकृत व्यापारी ठरताहेत डोकेदुखी
बाजार समितीसमोरील वाहतूक कोंडी; पालिकेचे दुर्लक्ष
जुईनगर, ता. २२ (बातमीदार) : मुंबई कृषी उत्पन्न बाजार समिती फळ आणि भाजीपाला मार्केटसमोरील रस्त्यावर नियमितपणे अनधिकृत व्यवसाय सुरू आहेत. पालिकेच्या कारवाईला न जुमानता राजरोसपणे येथील पदपथ आणि रस्त्याकडेला अधिकाऱ्यांच्या नाकावर टिच्चून हे व्यापारी व्यवसाय करत आहेत. परिणामी वाहतूक कोंडी होऊन बाजारात ये-जा करणाऱ्या वाहनांना अडथळा निर्माण होत आहे. तरी येथील अनधिकृत व्यापारावर कडक कारवाई करून कायमस्वरूपी मार्ग काढण्याची मागणी होत आहे, मात्र कारवाईचा दिखावा करत याकडे महापालिका दुर्लक्ष करत असल्याचा आरोप नागरिकांकडून केला जात आहे.
बाजार समितीमधील फळ आणि भाजीपाला या दोन्ही मार्केटचे मुख्य प्रवेशद्वार या रस्त्याच्या दिशेला असल्याने वाहने आत-बाहेर करताना वाहनचालकांना त्रास होत असतो. या प्रवेशद्वारांवर रिक्षा थांबेदेखील असून, या व्यापाऱ्यांमुळे रिक्षाचालकांना रिक्षा रस्त्याच्या कडेला उभ्या करताना अडचणी येतात. परिणामी काही रिक्षाचालकांवर वाहतूक विभागाची कारवाई होते. त्यामुळे हा अनधिकृत व्यापार सर्वांसाठीच डोकेदुखी ठरला आहे.

कारवाईनंतरही व्यापारी परत
या ठिकाणी पालिका नियमित कारवाई करत असल्याचे सांगण्यात येत आहे, परंतु कारवाईनंतर पाठोपाठ हे व्यापारी येथे येऊन व्यवसाय करतात. बाजार समिती अधिकारी, महापालिका अधिकारी आणि एपीएमसी वाहतूक विभाग यांच्या संयुक्तरित्या ही कारवाई केल्यास व्यापऱ्यांना हटविणे शक्य असल्याचे बोलले जात आहे. क्लॉक टॉवर चौक ते माथाडी भवन चौक हा बाजार समितीमधील अगदी प्रमुख रस्ता असून, या ठिकाणी होत असलेल्या वाहतूक कोंडीमागे हे व्यापारी असल्याचे बोलले जात आहे.