कासा रुग्णालयात दोन महिन्यांत ७८ सर्पदंशाचे रुग्ण

कासा, ता. २२ (बातमीदार) : डहाणू तालुक्यातील दुर्गम गावांमध्ये पावसाळ्यामध्ये सर्पदंशाचे प्रकार वाढले आहेत. कासा उपजिल्हा रुग्णालयात केवळ जून आणि जुलैमध्ये सर्पदंशाचे ७८ रुग्ण दाखल झाले आहेत. या अचानक वाढलेल्या रुग्णसंख्येमुळे रुग्णालयातील वैद्यकीय यंत्रणेवर ताण निर्माण झाला आहे.

जून, जुलैमध्ये सर्पदंशाचे रुग्ण वाढतात. रुग्णालय प्रशासनाच्या माहितीनुसार, जूनमध्ये ४२ सर्पदंश रुग्णांची नोंद झाली होती, तर जुलैमध्ये सोमवार (ता. २१)पर्यंत आणखी ३६ रुग्ण दाखल झाले. याशिवाय ८ जुलै रोजी विंचूदंशाचेही चार रुग्ण उपचारासाठी दाखल झाले होते. इतकेच नव्हे तर भटक्या कुत्र्यांनी चावा घेतल्यानेही अनेक जण रुग्णालयात दाखल होत असून, जूनमध्ये ४४ रुग्णांवर उपचार करण्यात आले.

सर्पमित्र प्रणय धानमेहेर यांनी सांगितले की, पालघर जिल्ह्यात सुमारे २३ प्रकारचे साप आढळतात. यामध्ये नाग, मण्यार, फुरसे, समुद्रसाप यांसारखे अत्यंत विषारी सापही आहेत. तसेच बिनविषारी सापांचाही मोठा संख्येने वावर असतो. पावसाळ्यात शेती, नदीकाठी मासेमारी, खेकडे पकडणे किंवा जंगलात वास्तव्य करणे यामुळे सर्पसंपर्क होण्याचे प्रमाण वाढते. सध्या बिळांत पाणी गेल्याने अनेक साप बाहेर पडत आहेत. त्यामुळे नागरिकांनी विशेष दक्षता घ्यावी.

कासा उपजिल्हा रुग्णालयाचे वैद्यकीय अधिकारी डॉ. सचिन वाघमारे म्हणाले की, सर्पदंश झालेल्या रुग्णांना वेळीच रुग्णालयात आणल्यास उपचार शक्य असतात, मात्र गंभीर स्थितीत असलेल्या रुग्णांना कधी कधी वापी, सिल्व्हासा किंवा पालघर येथे हलवावे लागते. रुग्णालयात विषारी सर्पदंशासाठी आवश्यक असलेली औषधे उपलब्ध आहेत.

काळजी घेण्याचे आवाहन
दरवर्षी पावसाळ्यात सर्पदंश व कुत्र्यांच्या चाव्याचे रुग्ण वाढत असल्याने यासाठी स्वतंत्र जनजागृती मोहिमा, औषधसाठा व प्रशिक्षित डॉक्टर उपलब्ध करून देण्याची गरज नागरिक व सामाजिक कार्यकर्ते व्यक्त करत आहेत. सर्पदंशाच्या घटनांपासून बचाव करण्यासाठी नागरिकांनी रात्री झोपताना जाळी लावलेली खिडकी, उचकटलेले दरवाजे बंद ठेवावेत, आडोशांखाली झोपू नये, घर व परिसर स्वच्छ ठेवावा, पायात नेहमी बूट वापरावेत, रात्री बाहेर जाताना टॉर्चचा वापर करावा, असे आवाहन करण्यात आले आहे.