पेण येथे अमृत मेळावा उत्साहात

पेण येथे अमृत मेळावा उत्साहात
अलिबाग, ता. १८ (वार्ताहर) ः महाराष्ट्र शासन उन्नती व प्रशिक्षण प्रबोधिनी (अमृत)तर्फे खुल्या प्रवर्गातील व्यक्तींसाठी राबविण्यात येणाऱ्या विविध योजनांचा लाभ सर्वांपर्यंत पोहोचावा, या उद्देशाने राज्यातील विविध तालुक्यांमध्ये मेळाव्यांचे आयोजन करण्यात येत आहे. त्या अनुषंगाने रायगड जिल्ह्यातील अमृत मेळावा कार्यक्रम पेण येथील भाऊसाहेब नेने सभागृहात रविवारी (ता. १४) झाल्याची माहिती जिल्हा व्यवस्थापक शैलेश मराठे यांनी दिली आहे.
या कार्यक्रमाचे प्रमुख पाहुणे म्हणून बापूसाहेब नेने उपस्थित होते. तसेच बँक ऑफ इंडिया, पेण शाखेचे व्यवस्थापक सौरभ पणशीकर व अमृतचे कोकण विभागीय व्यवस्थापक अमित सामंत हे उपस्थित होते. याप्रसंगी अमित सामंत यांनी अमृत संस्थेच्या सर्व योजनांची सविस्तर माहिती उपस्थित नागरिकांना दिली. आर्थिकदृष्ट्या दुर्बल घटकातील व्यक्तींनी उपलब्ध योजनांचा लाभ घ्यावा, असे आवाहन त्यांनी केले. एकमेका सहाय्य करू, अवघे धरू सुपंथ या विचाराला अनुसरून, संस्थेच्या लक्षित गटातील लाभार्थ्यांना योजनांची माहिती देऊन आवश्यक कागदपत्रांची पूर्तता करून योजनेचा संपूर्ण लाभ मिळवून देणे हे आपले कर्तव्य आहे, असे मत सामंत यांनी व्यक्त केले. मेळाव्याचे निमंत्रक मंगेश नेने यांनी सभागृह व अल्पोपहार व्यवस्थापनाची उत्तम जबाबदारी पार पाडली. सिंधुदुर्ग, रत्नागिरी, ठाणे, मुंबई, मुंबई उपनगर व रायगड जिल्हा सहव्यवस्थापक यांनी दिलेल्या मोलाच्या सहकार्याबद्दल रायगड जिल्हा व्यवस्थापक शैलेश विनायक मराठे यांनी कृतज्ञता व्यक्त केली. कार्यक्रमाचे प्रमुख पाहुणे बापूसाहेब नेने यांनी आपल्या विचारांचे सादरीकरण केले. त्यानंतर बँक ऑफ इंडिया, पेण शाखेचे व्यवस्थापक सौरभ पणशीकर यांनी बँकेच्या माध्यमातून लक्षित गटाला कोणत्या प्रकारे सहकार्य करता येईल तसेच अमृत संस्थेच्या योजनांचा लाभ कसा घेता येईल, याबाबत आपले विचार व्यक्त केले.