नवी मुंबईत १०० उपक्रमांचा पंधरवडा सुरू

नवी मुंबईत १०० उपक्रमांचा पंधरवडा सुरू
वनमंत्री गणेश नाईक यांच्या वाढदिवसानिमित्त सेवाभावी उपक्रम
नवी मुंबई, ता. १८ (बातमीदार) ः वनमंत्री तथा नवी मुंबईचे पालकमंत्री गणेश नाईक यांच्या वाढदिवसानिमित्त ‘सेवाभावी १०० उपक्रमांचा पंधरवडा’ मोठ्या उत्साहात सुरू झाला आहे. माजी विरोधी पक्षनेते दशरथ भगत यांच्या संकल्पनेतून, युवानेता निशांत भगत व समाजसेवक संदीप भगत यांच्या नेतृत्वाखाली या उपक्रमांना प्रारंभ झाला. सामाजिक, शैक्षणिक, आरोग्य, क्रीडा, सांस्कृतिक आणि धार्मिक क्षेत्रांमध्ये विविध कार्यक्रम राबवून या उपक्रमाचा विस्तार होत आहे.
या उपक्रमांतर्गत विविध समाजोपयोगी कार्यक्रम पार पडले. यामध्ये सानपाडा, जुईनगर आणि वाशी विभागातील सोसायटी सुरक्षा रक्षकांचा विशेष सन्मान करण्यात आला. तसेच १०० दिवसांसाठी विविश शैक्षणिक अकाउंटिंग कोर्ससाठी गरजू विद्यार्थ्यांना प्रत्येकी पाच हजार रुपयांपर्यंत शिष्यवृत्ती देण्यात आली. संगणक शिक्षणाच्या प्रसारासाठी प्रत्येक कोर्सवर २५ टक्के सवलती जाहीर करण्यात आल्या.
याशिवाय वाशी गाव येथील प्रगती विद्यालयात भविष्यकालीन संगणक कोर्सेस या विषयावर व्याख्यान आयोजित करण्यात आले. यामध्ये विद्यार्थ्यांना नव्या तंत्रज्ञानाच्या संधींची माहिती मिळाली. या सर्व उपक्रमांचा उद्देश स्थानिक जनतेपर्यंत शिक्षण, तंत्रज्ञान आणि सामाजिक सुरक्षा यांचे फायदे पोहोचवणे हा आहे. आगामी दिवसांमध्ये आरोग्य, रक्तदान शिबिरे, क्रीडा स्पर्धा, महिला व युवकांसाठी विशेष कार्यशाळा यांसह १०० उपक्रमांतर्गत अनेक सेवा प्रेरित कार्यक्रम आयोजित होणार असल्याचे आयोजकांनी सांगितले.