यकृतासाठी मुंबई पोलिसांचा ग्रीन कॉरीडोर

यकृतासाठी मुंबई पोलिसांचा ग्रीन कॉरिडॉर
मुंबई, ता. २४ ः दिवाळीच्या गर्दीत आणि भाऊबीजेच्या वाहतुकीच्या ताणातही मुंबई वाहतूक पोलिसांनी एका व्यक्तीचा जीव वाचवण्यासाठी बुधवारी (ता. २२) सर्वतोपरी प्रयत्न केले. नालासोपारा (पश्चिम) येथील सिद्धिविनायक मल्टिस्पेशालिटी रुग्णालयातून जिवंत यकृत (लाइव्ह लिव्हर) गिरगाव येथील सर एच. एन. रिलायन्स फाउंडेशन रुग्णालयात अवघ्या ४३ मिनिटांत पोहोचवण्यात आले.

अवयव वाहतुकीसाठी पोलिसांनी विशेष ग्रीन कॉरिडॉर तयार केला होता. अधिकाऱ्यांच्या माहितीनुसार, सुरुवातीला बुधवारी सकाळी साडेआठ वाजता यकृत नालासोपाऱ्यातून निघणार होते; परंतु काही कारणास्तव थोडा विलंब झाला आणि दुपारी सुमारास सिद्धिविनायक मल्टिस्पेशालिटी रुग्णालयातून अवयवाची वाहतूक सुरू झाली. अवयव वाहतूक करणारी रुग्णवाहिका दहिसर चेकनाक्यावर दुपारी १२.४७ वाजता पोहोचल्यावर मुंबई पोलिसांनी योग्यरीत्या आखलेल्या योजनेनुसार ग्रीन कॉरिडॉर सक्रिय करण्यात आला. पुढे तो दहिसर चेकनाका, पश्‍चिम द्रुतगती महामार्ग, भुलाभाई देसाई रोड, सेंट स्टीफन्स चर्च जंक्शन, बाबुलनाथ मंदिर, सुखसागर जंक्शन, एच. एन. रिलायन्स हॉस्पिटल वाहतुकीच्या प्रत्येक चौकात तैनात पोलिसांनी वेळेवर समन्वय साधत मार्ग मोकळा ठेवला. पथदर्शक वाहनाच्या (पायलट वाहन) साहाय्याने यकृत वाहून नेणारी रुग्णवाहिका सुरक्षितपणे आणि वेळेत रुग्णालयापर्यंत पोहोचली.