बोनकोडे सिग्नलजवळ कारच्या धडकेत तरुण ठार

पामबीच मार्गावर कारच्या धडकेत तरुण ठार
नवी मुंबई, ता. २४ (वार्ताहर) : पामबीच मार्गावरील बोनकोडे सिग्नलजवळ गुरुवारी (ता. २३) मध्यरात्री भरधाव रेनॉल्ट डस्टर कारने पाठीमागून धडक दिल्याने एका तरुणाचा मृत्यू झाला. कन्हैया प्रेमचद बिंद (वय २९, रा. कोपरीगाव) असे मृत तरुणाचे नाव आहे. कन्हैया रात्री रिक्षा चालवण्यासाठी पायी बोनकोडे सिग्नलजवळ रिक्षा घेण्यासाठी जात असताना हा अपघात झाला. अपघातानंतर कार चालकाने कन्हैयाला पालिकेच्या रुग्णालयात दाखल केले; परंतु डॉक्टरांनी त्याला मृत घोषित केले. याप्रकरणी एपीएमसी पोलिसांनी अपघातास कारणीभूत असलेल्या कार चालकाविरोधात गुन्हा दाखल करून पुढील कारवाई सुरू केली आहे.