भाईंदरमध्ये ‘महाराष्ट्राची खाद्य जत्रा’ला नागरिकांचा उत्स्फूर्त प्रतिसाद

‘महाराष्ट्राची खाद्य जत्रा’ला नागरिकांचा उत्स्फूर्त प्रतिसाद
भाईंदर, ता. २४ (बातमीदार) : भाईंदर (पूर्व) येथील हिंदुहृदयसम्राट बाळासाहेब ठाकरे मैदानात २३ ते २६ ऑक्टोबर २०२५ दरम्यान आयोजित ‘महाराष्ट्राची खाद्य जत्रा’ला खवय्यांचा आणि नागरिकांचा मोठा प्रतिसाद मिळत आहे. मॅजिक टच इव्हेन्ट्स आयोजित आणि कोल्हापूर जिल्हा महिला विकास मंडळ व मिरा-भाईंदर महानगरपालिका सह-प्रायोजक असलेली ही जत्रा महाराष्ट्राच्या खाद्यसंस्कृतीचा एक बहारदार उत्सव ठरत आहे.
दिवाळीच्या पार्श्वभूमीवर ही जत्रा एक विशेष आकर्षण बनली आहे. यामध्ये पुरणपोळी, ठेचा, पिठलं-भाकरी, मिसळपाव, थाळीपीठ, मोदक अशा पारंपरिक पदार्थांसोबतच आधुनिक फ्युजन डिशेसचाही अनोखा संगम आहे.
केवळ खाद्यपदार्थच नव्हे, तर लाइव्ह म्युझिक आणि विविध सांस्कृतिक कार्यक्रमांमुळे जत्रेचे वातावरण अधिक रंगतदार झाले आहे. नागरिक कुटुंबासह मोठ्या संख्येने उपस्थित राहून चव आणि संस्कृतीचा दुहेरी आनंद घेत आहेत.
महाराष्ट्राच्या चवींचा आणि संस्कृतीचा आस्वाद घेण्यासाठी नागरिकांनी या जत्रेला नक्की भेट द्यावी, असे आवाहन आयोजकांनी केले आहे.