अवजड वाहतुकीदरम्यान ट्रेलर पलटी

अवजड वाहतुकीदरम्यान ट्रेलर पलटी
रोहा, ता. २६ (बातमीदार)ः रोहा रेल्वे यार्डामधून लोखंडी कॉईल घेऊन निघालेला ट्रेलर रेल्वे यार्ड हद्दीच्या बाहेर पलटी झाल्याची घटना घडली. या घटनेत ट्रेलरचालक सुखरूप बचावला, मात्र ट्रेलरची क्लिप तुटल्याने हा अपघात झाल्याची प्राथमिक माहिती आहे.
रोहा रेल्वे स्थानकालगत जेएसडब्ल्यू कंपनीच्या मालकीचा स्वतंत्र यार्ड आहे. या ठिकाणी देशभरातून रेल्वेमार्गाने उद्योगांना लागणारा कच्चा माल येतो. या मालाची जिल्ह्यातील विळे भागाड, महाड, गडब, साळाव भागातील कंपन्यांपर्यंत डम्परने वाहतूक केली जाते. शनिवारी (ता. २५) दुपारी ३ च्या सुमारास २४ टन वजनाची लोखंडी कॉईल घेऊन एक ट्रेलर भागाडकडे मार्गस्थ झाला होता. त्या वेळी रोहा रेल्वे हद्द सोडून पिंगळसई पंचक्रोशी येथून जाणाऱ्या रस्त्याच्या बाजूला क्लिप तुटल्यामुळे ट्रेलर शेतात कंलडला. हा परिसर निर्मनुष्य असल्याने कोणतीही जीवितहानी झालेली नाही, पण अशा प्रकारच्या घटना वारंवार घडत असल्याने अवजड वाहनांची सुरक्षाविषयक चाचणी करण्याची मागणी स्थानिकांकडून होत आहे.