रन फॉर युनिटीद्वारे टिटवाळ्यात एकतेचा संदेश

''रन फॉर युनिटी''द्वारे एकतेचा संदेश
सरदार पटेल जयंतीनिमित्त मॅरेथॉनला नागरिकांचा उत्स्फूर्त प्रतिसाद
टिटवाळा, ता. १ (वार्ताहर): राष्ट्रीय एकता दिनानिमित्त आणि सरदार वल्लभभाई पटेल यांच्या जयंतीच्या औचित्याने टिटवाळ्यात शुक्रवारी (ता.३१) रन फॉर युनिटी या मॅरेथॉनचे उत्साहात आयोजन करण्यात आले. कल्याण तालुका पोलिस ठाणे (ग्रामीण) यांच्या वतीने आयोजित या मॅरेथॉनमध्ये एकता, अखंडता आणि राष्ट्रीय सुरक्षा या संदेशासह नागरिकांनी मोठ्या संख्येने सहभाग नोंदवला. सकाळी बरोबर साडेसात वाजता वाजपेयी चौक येथून मॅरेथॉनला सुरुवात झाली आणि मातादी मंदिर रोड मार्गे गणपती मंदिर चौक येथे ती संपन्न झाली. ''एक भारत, श्रेष्ठ भारत''चा नारा देत तरुण, विद्यार्थी, पोलीस कर्मचारी, सामाजिक संस्था आणि स्थानिक नागरिक उत्साहाने धावले. यावेळी परिसरात ''भारत माता की जय'' आणि ''एकता झिंदाबाद''च्या घोषणा दुमदुमल्या. या उपक्रमाद्वारे ''एकता आणि अखंडता हीच खरी भारताची शक्ती आहे,'' असा संदेश नागरिकांना देण्यात आला.

पोलिस अधिकारी आणि स्थानिक प्रशासनाने कार्यक्रमाची काटेकोर तयारी केली होती. सुरक्षेच्या दृष्टीने पोलिस बंदोबस्त, वाहतूक नियंत्रण आणि वैद्यकीय पथकांची योग्य व्यवस्था करण्यात आली होती. सहभागींना प्रोत्साहन देण्यासाठी नागरिक रस्त्याच्या दुतर्फा उभे राहून टाळ्यांच्या गजरात त्यांचे स्वागत करत होते.

राष्ट्रीय एकतेबद्दल जागरूकता
ठाणे ग्रामीणचे पोलिस अधीक्षक डॉ. डी.एस. स्वामी, ठाणे ग्रामीणचे अप्पर पोलिस अधीक्षक अनमोल मित्तल आणि मुरबाड विभागाचे उपविभागीय पोलिस अधिकारी अनिल लाड यांच्या मार्गदर्शनाखाली, तसेच कल्याण तालुका पोलिस ठाण्याचे पोलिस निरीक्षक पंकज गिरी यांच्या नियोजनाखाली हा कार्यक्रम यशस्वीरीत्या झाला. पोलिस ठाण्याच्या पुढाकारामुळे नागरिकांमध्ये राष्ट्रीय एकतेबद्दल जागरूकता निर्माण झाली.