प्रशिक्षणार्थी विद्यार्थ्यांचा सन्मान

न्यूझीलंडमध्ये नोकरी करणाऱ्या प्रशिक्षणार्थीचा सन्मान
कल्याण, ता. १ (बातमीदार) ः सारथी स्कूल ऑफ हॉटेल मॅनेजमेंटमधून प्रशिक्षण पूर्ण करून न्यूझीलंडमध्ये नोकरी करण्यासाठी जाणाऱ्या रोशन चकोर आणि सुशांत वाणी या दोन तरुणांचा मातोश्री गुंजाई फाउंडेशनच्या माध्यमातून भेटवस्तू देऊन सन्मान करण्यात आला. हॉटेल मॅनेजमेंटचे प्रशिक्षण पूर्ण करून कष्ट, जिद्द आणि कौशल्याच्या बळावर या दोन्ही तरुणांनी न्यूझीलंडमध्ये नोकरीची संधी मिळवली आहे. शुक्रवारी या विद्यार्थ्यांनी महेश गायकवाड यांची सदिच्छा भेट घेऊन त्यांचे आभार मानले. या वेळी महेश गायकवाड यांनी या तरुणांचे अभिनंदन केले आणि त्यांच्या भावी वाटचालीस शुभेच्छा दिल्या. ते म्हणाले, हे फक्त या युवकांचे वैयक्तिक यश असले तरीही त्यांचे हे यश आपल्या परिसरातील सर्व तरुणांसाठी प्रेरणादायी उदाहरण आहे. स्वप्न मोठे असावे आणि प्रयत्न सातत्याचे असावेत, हे त्यांनी सिद्ध केले आहे. गायकवाड यांनी विश्वास व्यक्त केला, की हे विद्यार्थी जगाच्या कुठल्याही कोपऱ्यात गेले तरी भारताची संस्कृती, मेहनत आणि आत्मविश्वास याचे प्रतिनिधित्व करतील.