दोन ट्रकवर मोर्च्यातील नेत्यांचा भार

दोन ट्रकवर मोर्चातील नेत्यांचा भार
मुंबई, ता. १ महाविकास आघाडी आणि त्यांच्या घटक पक्षांनी आज मुंबईत काढलेल्या सत्याचा मोर्चाच्या सभेचा मंच हा मुंबई महापालिका मार्गावर चक्क दोन ट्रक एकमेकांना जोडून तयार करण्यात आला हाेता. त्या दोन ट्रकने तयार केलेल्या व्यासपीठाने महाविकास आघाडीच्या सर्व नेत्यांचा भार वाहिला.
जागा कमी असल्याने अनेक नेत्यांना खाली बसावे लागले तर महाविकास आघाडीचे प्रमुख नेते त्यावर होते. समोर पाहताना मोठे व्यासपीठ ‍दिसेल, अशा प्रकारची रचना दोन्ही ट्रकना जोडून करण्यात आली होती. शेजारी रस्त्यावर स्पीकर, दूरवर आवाज जाणारे भोंगे त्यासाठी नियंत्रण करणारी यंत्रणा लावण्यात आली होती.
महाविकास आघाडीच्या या सत्याचा मोर्चाला प्रशासनाने परवानगी दिली नसल्याने त्यांनी हा रस्त्यावरच अनोख्या प्रकारे व्यासपीठ थाटून आपला मोर्चा आणि एकूण कार्यक्रम यशस्वी केल्याचे दिसून आले.