जिवंत काडतुसासह तरुणाला अटक

भिवंडी, ता. १ (वार्ताहर) : भिवंडीत स्थानिक स्वराज्य संस्थांच्या आगामी निवडणुकांच्या पार्श्वभूमीवर पोलिसांकडून वाढीव गस्त आणि तपास मोहीम राबवली जात आहे. त्याचदरम्यान, राजनोली नाका परिसरात पिस्तुल आणि एक जिवंत काडतूस बाळगणाऱ्या तरुणाला भिवंडी गुन्हे शाखेच्या पथकाने अटक केली आहे. वाहीद मंजूर खान (वय २३, रा. आंबिवली, ता. कल्याण) असे आरोपीचे नाव आहे.
पोलिसांना गुप्त बातमीदारामार्फत राजनोली नाका बायपास परिसरात एक व्यक्ती पिस्तुल घेऊन येणार असल्या माहिती मिळाली होती. त्यानंतर वरिष्ठ अधिकाऱ्यांच्या मार्गदर्शनाखाली भिवंडी गुन्हे शाखेच्या पथकाने शुक्रवारी (ता. ३१) दुपारी चार वाजता सापळा रचला. सापळ्यात पोलिसांनी नाशिककडे जाणाऱ्या रस्त्यावर उड्डाणपुलाजवळील ओम साई ढाबा आणि चायनीज कॉर्नरच्या पुढे येणाऱ्या संशयिताला थांबवून चौकशी केली. त्याच्याजवळ स्टील बनावटीचे पिस्तुल आणि एक जिवंत काडतूस असा एकूण ३० हजार ३०० रुपयांचा मुद्देमाल आढळून आला. त्यानंतर पोलिसांनी वाहीद खान याला ताब्यात घेतले. याप्रकरणी भिवंडी गुन्हे शाखेच्या वतीने कोनगाव पोलिस ठाण्यात गुन्हा नोंदवून अटक करण्यात आली आहे. वाहीदने पिस्तुल आणि काडतुसे कोठून मिळवली आणि त्याचा हेतू काय होता, याचा तपास पोलिसांकडून सुरू आहे. या कारवाईमुळे निवडणुकीच्या पार्श्वभूमीवर गुन्हेगारी हालचालींवर पोलिसांचे नियंत्रण अधिक मजबूत झाले आहे. तसेच, भिवंडीत सुरक्षा यंत्रणा सतर्क झाल्याचे दिसून येत आहे.