प्रतिबंधित कोरेक्स सिरपच्या ४०० बाटल्यांसह एक ताब्यात

कल्याणमध्ये प्रतिबंधित ''कोरेक्स'' सिरपसह एकास अटक
कल्याण, ता. १ (वार्ताहर) : कल्याण शहरात अंमली पदार्थांच्या (नशील्या वस्तूंच्या) अवैध विक्रीवर नियंत्रण मिळवण्यात पोलिसांना मोठे यश मिळाले आहे. पोलिस उपआयुक्त अतुल झेंडे यांच्या विशेष पथकाने शनिवारी (ता. १) एका व्यक्तीला प्रचंड प्रमाणात प्रतिबंधित कोरेक्स सिरपच्या साठ्यासह ताब्यात घेतले आहे.
बाजारपेठ पोलिस ठाण्याच्या हद्दीत, एपीएमसी मार्केटजवळ, फोर्टिस हॉस्पिटलच्या नजीक ही कारवाई करण्यात आली. मोहम्मद मेहताब अनीस (वय ३३) असे अटक केलेल्या व्यक्तीचे नाव आहे. आरोपीवर एनडीपीएस कायद्याचे कलम ८(क) आणि २२(ख) अंतर्गत गुन्हा दाखल करण्यात आला आहे. पोलिसांनी कोरॅक्स सिरपच्या ४०० बाटल्या जप्त केल्या. याची अंदाजित किंमत ४ लाख रुपये आहे. यात ६० हजार रुपयांची एक मोटारसायकल आणि ३,६६० रुपये रोख रक्कम असा एकूण सुमारे चार लाख ६३ हजार ६६० रुपये किमतीचा मुद्देमाल जप्त करण्यात आला.
प्राथमिक तपासात आरोपी हा प्रतिबंधित सिरप शालेय आणि महाविद्यालयीन विद्यार्थ्यांना विकून अवैध नफा कमवत असल्याचे उघड झाले आहे. आरोपी यापूर्वीही महात्मा फुले पोलीस ठाण्यात एका गुन्ह्यातील आरोपी होता, अशी माहिती सूत्रांनी दिली आहे.