पावसाने शेतात चिखलाचे राज्य

पावसाने शेतात चिखलाचे राज्य
चोळे-शिहू भागात भातपिकाचे नुकसान
पोयनाड, ता. २ (बातमीदार) : पेझारी-नागोठणे रस्त्यावरील चोळे-शिहू भागात शेतांमध्ये पाणी साचल्याने भातपिकाची मोठी हानी झाली आहे. यामुळे शेतकऱ्यांचे अतोनात नुकसान झाले असून, नुकसानभरपाई देण्याची मागणी जोर धरू लागली आहे.
काही दिवसांपासून सतत कोसळणाऱ्या पावसामुळे चोळे, शिहू, गांधे, आंबेराई भागातील भातशेतीचे नुकसान झाले आहे. या परिसरातील भातशेती रस्त्यालगत असल्याने कापणी झाल्यानंतर रस्त्याच्या एका बाजूला त्याची झोडपणी, मळणी केली जाते, पण पाऊस सातत्याने पडत असून, रस्त्याच्या कडेला कापणी केलेल्या भाताचे ढीग एकत्र करून ठेवले आहेत. त्यातून किती भात निघणार, असा प्रश्न शेतकऱ्यांना सतावत आहे. अवकाळी पावसाने भाताच्या पिकाचा बहर घालवला आहे. या परिसरात कापणी केलेला भात पूर्ण भिजला असल्याने पीक मातीमोल झाले आहे.
------------------------
मळणीसाठी ताडपत्रीचा आधार
चोळे शिहू भागात अवकाळी पावसाने भातपिकाचे मोठे नुकसान केले आहे. त्यामुळे भिजलेल्या भातपिकाची ताडपत्रीचा आधार घेत मळणी झोडण्याची वेळ येथील शेतकऱ्यांवर आली आहे.